Datierung: 1166 09 – 12
In nomine dei omnipotentis. Heinricus divina favente clementia laureshamensis abbas, universis Christi fidelibus futuris ac presentibus in perpetuum. Aequitatis ratio, ac officii nostri debitum exigit, ut inter dispensatores familiae, dei nos quoque pro modulo nostro fideles inveniamur, et necessitatibus sanctorum pio affectu communicemus. Quapropter ad omnium Christi fidelium notitiam devolvimus, qualiter nos fratrum ac fidelium nostrorum precibus exorati, fundum aecclesiae nostrae in vico
Frenkenvelt
, in termino villae Gernesheim situm, et ad dispositionem cellerarii fratrum nostrorum pertinentem, sustentationi ancillarum Christi in Gomersheim commanentium, sub annua pensione concessimus, quatinus exinde predicto fratrum cellerario, quinque uncias nostrae monetae annuatim persolvant, cum solita illatione decimarum tam de animalibus quam de usu fructuario, ad ecclesiam nostram ex antiquo aspicientium; statuentes, ut hec nostrae concessionis auctoritas a successoribus nostris firma et inconvulsa perpetuo conservetur, et quousque prefatae famulae dei prefixum censum ac decimas integre persolverint, nullum a quolibet ibidem patiantur preiudicium. De cetero vero nullis exactionibus, nullis molestiis subiciantur, sed rebus a nobis sibi concessis libere perfruantur. Ut autem huius facti observantia commendabilior et certior apud posteros habeatur, cartam hanc exinde conscriptam, sigillo aecclesiae nostrae confirmari precepimus, subnotatis etiam qui presentes aderant idoneis et probatis testibus. Rehwinus decanus, Lanzo et Ruodolfus prepositi. Fridericus et
Dauid
monachi. Craft, Giselherus, Arnoldus, ministeriales. Fridericus, Heinricus, et Cunradus, et alii plurimi de familia sancti Nazarii. Actum Laurissae. Anno ab incarnatione Christi | MoCoLXoVIo. Indictione XV. Regnante gloriosissimo Romanorum imperatore Friderico.
Sub eodem tempore vetus ac frequens altercatio inter fratres laureshamenses et cives in Angeren, super aecclesia ibidem sita, sinodali decreto apud Traiectum hoc modo conquievit.