Datierung: 1141
Theotwinus dei gratia sanctae Rufinae episcopus, apostolicae sedis legatus, Baldemaro abbati de Blidenstat, spiritum humilitatis et obaedientiae. Quoniam contra sanctorum patrum instituta, lorsensem abbatiam occupasti, et de pluribus enormitatum capitulis apud nos accusatus, statuto die et loco vocatus, nec venisti nec canonicam excusationem misisti, consilio et iudicio religiosorum virorum te prefata dignitate privavimus, et ipsius abbatiae monachos, clericos et laicos, a tua subiectione, fidelitate, et obedientia liberavimus, et absolvimus. Mandamus itaque tibi et ex parte domni papae precipimus, ut de predicti loci amministratione et prelatione de cetero te non intromittas, eiusque res et personas inquietare, invadere vel molestare nullatenus presumas. Durum est tibi contra stimulum calcitrare.