Formulae - Litterae - Chartae: Leseumgebung

Codex Laureshamensis Teil: Bd. 1, Einleitung, Regesten, Chronik Kap. Nr. 142b

Geroldus, incertum ex ipsa congregatione, an aliunde assumptus. Iste curtim dominicalem, Stehelin Mesela dictam, iuri custodis laureshamensis assignauit, sicut et alia eiusdem nominis, in qua abbas Anshelmus ob tuitionem aecclesiae castrum construxerat, in dispositionem portarii accessit. Quo post annos VI uita excedente, Hugo quidam Gingenbacensis abbas, non quidem fratrum electione, sed imperiali permissione, mox, sicut institutus, ita et destitutus eadem est aecclesia. Per id temporis, domestica discordia et inexorabile odium, inter Heinricum IIII imperatorem patrem, filiumque eius Heinricum V coniuratione principum efferbuit, facileque tum quiuis studia partium fouens, ad quamlibet aecclesiasticam dignitatem aspirabat. Prefuit tunc hirsaugiensi monasterio, post illum beatum et opinatum eiusdem loci patrem Willehelmum, Gebehardus, tum natalium splendore conspicuus, tum etiam consilii uiuacitate in palatio satis acceptus, cui se non tam fidelitatis quam ambitionis gratia familiarem exhibebat. Hoc optentu, primo laureshamensem abbatiam, deinde episcopatum spirensem, velut ex imperiali concessione uendicauit. Nec mora, rebus abbatiae plurimum profligatis, fratres ipsius aecclesiae filios, quorum odia sibi merito consciuerat, propulsare statuit, arreptaque occasione, quasi sub religionis pretextu, hirsaugiensium consuetudinum nouitates quae nuper aemerserant, per aduentitios monachos, ac barbatos, ac huiusmodi laruas potius quam personas subintroduxit. Quibus ipsius aecclesiae nutritii fratres pro defensione gorziensis seu cluniacensis ordinis, quem ab antiquo traditum seruauerant, acrius obnitentes, Hirsaugiensium factione paene omnes domo propulsi, ac aliquandiu dispersi sunt. Eoque factum est, ut exinde commissura rudis panni in uestimentum uetus missa, peiorem scissuram fecerit, et utraeque consuetudines insimul permixte, immo confusae, neutram apud nos plenarie habeant obseruantiam. Qualiter uero prefati Hirsaugienses post mortem Gebehardi ex eodem loco profugati, ac fratres honorificae sint reducti, consequenter explicabimus. Nam tenuit ipsam abbatiam annis duobus, Spiraeque sepultus est.