In nomine domini nostri Iesu Christi dei aeterni. Cuonradus divina ordinante providentia rex. Si petitionibus fidelium nostrorum utpote rationabilibus clientelae nostrae favore assensum praebemus, non solum regiam exercemus consuetudinem, verum etiam ad aeternam beatitudinem profuturum nobis fore credimus. Comperiat igitur sanctae dei ecclesiae omnium tam praesentium quam futurorum congregatio fidelium, quod vir venerabilis domnus Theobaldus Viennensis ecclesiae archiepiscopus nostri serenitatem adiens culminis cum gregis sibi commissi honestis personis cleri et laici ordinis praeferens manibus sanctiones ac praecepta regum priorum Lotharii et Karoli nec non et Ludouici, qui sanctorum praedecessorum suorum interventu, beati scilicet Adonis interventu et Ragamfredi sive domni Alexandri, indulserant praefatae sanctae ecclesiae Viennensi, beatorum scilicet martyrum Mauricii gloriosi cum beatis sociis, sub omni immunitate sibi corroborari quicquid possidere iuste et more ecclesiastico obtinere licuit ac licere cognoscitur, praedia scilicet et omnem honoris munificentiam, novo denuo ordine petiit, ut res eiusdem ecclesiae per nostri corroborationem praecepti ibidem deo militantibus canonicis confirmaremus, quicquid scilicet ad communionem pertinet fratrum et ut in locis sancti Mauricii patroni nostri magni aut abbatiis ibi positis sive aliquibus territoriis nulla fieret exactio de possessionibus sui iuris, sed quicquid adepti vel adepturi sunt, securo ac iusto ordine obtinerent. Cuius petitioni libenter annuimus et, prout ipse voluit et clerici sibi commissi deprecati sunt, facere non distulimus. Itaque praecipiendo sancimus pariterque iubemus, ut nullus iudex publicus vel quilibet ex iudiciaria potestate sive aliquis ex fidelibus nostris in ecclesiis aut in locis vel agris seu reliquis possessionibus memoratae ecclesiae sanctorum martyrum, quas moderno tempore iuste et rationabiliter in quibusdam pagis aut quibuslibet territoriis possidere videtur vel quibus eam divina maiestas augere voluerit, ad causas iudiciario more audiendas vel freda aut mansionaticos vel paratas faciendas aut fideiussores tollendos ingredi audeat seu tollere praesumat, homines scilicet ecclesiae tam servos quam ingenuos neque distringat nec ullas redibitiones vel inlicitas occasiones iniuste requirat aut exigere audeat nec teloneum in aquis vel terris nec redibitionem de pascuis nec silvaticum nec fumaticum nec pulveraticum, sed quicquid de rebus praefatae ecclesiae poterat fiscus exigere, totum nos pro aeterna remuneratione praedictae ecclesiae concedimus remissione perpetua, ut iugiter Christi famulos in iam dicta ecclesia persistentes dei misericordiam pro nobis exorare delectet. Et ut haec auctoritas nostris futurisve temporibus domino protegente valeat inconvulsa manere, manu propria eam subter firmavimus et anuli nostri impressione adsignari iussimus.
Signum Gunradi (M.) regis serenissimi.
Anno ab incarnatione domini DCCCCLXXII datum est Viennae praeceptum istud publicae per manum primi cancellarii Eidoardi in sacro palatio iussu regis.