Karl der Grosse bestätigt dem Kloster Kremsmünster auf Bitte des Bischofs Walderich von Passau den von Herzog Tassilo geschenkten Besitz.
Datierung: 789 03
Ausstellungsort: Aachen
(C.) In nomine sanctae et individuae trinitatis. Karolus dei gratia imperator auguatus. Si petitiones servorum dei iustas et rationabiles ad effectum perducimus, hoc nobis procul dubio et ad capessenda regni caelestis gaudia et ad regni nostri stabilitatem profuturum liquido credimus. Quapropter comperiat omnium fidelium nostrorum presentium scilicet et futurorum industria, qualiter dilectus noster Uualdaricus sanctae Patauiensis aecclesiae presul venerandus nostram imperialem adiit celsitudinem rogando, ut loca, que Tassilo dux Baiouuariorum tradidit ad monasterium, quod ipse in honore sancti Salvatoris infra waldum nostrum in loco qui vocatur Cremisa a fundamentis construxit, per cartam nostrae auctoritatis augeremus et confirmaremus, hoc est in pago Trungoue Sulzibahc et Sicbab, Liubilinbahc et quicquid inter duo flumina que vocantur Ipphas esse cernitur, nec non decaniam unam de illis Sclauis, super quos actores sunt Taliup et Sparuna, et XXX Sclauos iuxta fluvium Todicha nec non territorium ad eandem decaniam pertinens, ut Phisso et Arno episcopus coniuraverunt. Insuper etiam terram illam, quam Sclaui prope flumina Todicha et Sirnicha sine licencia Tassilonis ducis stirpaverunt; similiter et in loco qui vocatur Eporestal; si vero illi Sclaui rectum censum et laudabile servicium facere voluerint, terram illam possideant, sin autem liberi discedant; Pettinbahc vero et quicquid ad eandem curtem pertinet, Lapidem, lacum Albinae adiacentesque alpes cum omnibus usibus et in nemore pastus porcorum nec non edificia omnique anno arborem electam navem ad faciendam; ad Eporestal de eodem nemore fenum pastumque et pascua, exstirpationes, septa apum et cum omnibus usibus, sicut Leodro comes in beneficium habuit; Aliinchoua cum omni integritate et cum appenditiis vel adiacentiis suis; in Ascaha vineas duas cum vinitoribus, in Rotala vineas tres cum vinitoribus tribus et fabros VII nec non piscatores IIII et procuratores apum V; ubicumque etiam loca eiusdem monasterii forestis nostris adiaceant, pastum et pascua nec non edificia inde habeant sine censu. Quod vero piis auribus percipientes per interventum eiusdem pontificis et per fratrum ad idem monasterium deo famulantium imminentes necessitates eadem loca, que Tassilo ad eundem locum tradidit, imperiali auctoritate confirmavimus et, que per nostri iuris donationem ad prescripta eiusdem monasterii loca donanda erant, donavimus. Et ut hec auctoritas nostre donationis atque confirmationis per futura tempora credatur et conservetur, manu propria firmavimus et anulo nostro insigniri iussimus.
Signum domni Karoli (M.) invictissimi imperatoris.
Indictione IIII. Erchanbald notarius advicem Radoni archicappellani recognovi (SR.) (SI). Anno dominice incarnationis DCCCII.
Data in mense mart. anno XXI regni nostri; actum Aquis palatio; feliciter in dei nomine amen.