Karl der Grosse schenkt dem Kloster Hersfeld die Kirche zu Grebenau mit den Zehnten.
Datierung: 786 08 31
Ausstellungsort: Worms
Carlus gratia dei rex Francorum et Longobardorum ac patricius Romanorum. Quicquid locis sanctorum venerabilium ob amorem domini et oportunitatem servorum dei concedimus vel confirmamus, hoc nobis ad remedium anime nostre vel stabilitatem regni nostri in dei nomine pertinere confidimus. Idcirco notum sit magnitudini omnium fidelium nostrorum presentium scilicet et futurorum, qualiter ad monasterium Herolfesfeld super ripam Fulde fluminis in honore beatorum apostolorum Symonis et Thathei constructum rogatu Lulli Mogontiacensis archiepiscopi, instructoris eiusdem loci, donamus nos eclesiam in Grabonouua ab eodem Lullo episcopo constructam cum omni integritate, id est decimatione terris domibus edificiis mancipiis silvis campis pratis pascuis aquis aquarumve decursibus moli[s mole]ndinis viis et inviis exitibus et reditibus quesitis vel inquirendis seu cum omnibus, que dici vel nominari possunt, utilitatibus a loco qui dicitur Suuerzeluurde usque Dagkenbrunnon et indo ad Medelhereshuson et sic per Nisdenbahc usque Humbenrod et contra Buhcchenenuuird usque ad flumen Fulde indeque sursum per eiusdem fluminis alveum usque ad Steinincruce et inde in Breidenbahc et sic sursum usque in Uuatdenbahc sicque deorsum usque in Milzisa et in Massenbrunnon, deinde in Crepelessore et sic super Rodenhard et inde deorsum per silvaticam viam usque Suuerzeluurde. Propterea hanc preceptionem auctoritatis nostre conscribi iussimus, ut nullus de iudiciaria potestate Bunoni abbati eiusdem loci vel successoribus eius calumniam vel contrarietatem quoquo tempore facere presumat. Et ut hec auctoritas firmior habeatur, sigilli nostri inpressione confirmari iussimus.
Signum (M.) Caroli gloriosissimi regis.
(C.) Uuigbaldus advicem Radonis regonnovi. (SI.)
Data pridie kal. septemb. indictione VII, anno XVIII et XIII regni nostri; actum Uuormacia palatio nostro; in dei nomine feliciter.