Karl der Grosse verleiht der Kirche von Grado Immunität.
Datierung: 803 08 13
Ausstellungsort: Salz
Carolus serenissimus augustus a deo coronatus magnus et pacificus imperator Romanum gubernans imperium, [qui] et per misericordiam dei rex Francorum et Longobardorum. Maximum regni nostri in hoc augere credimus munimentum, si petitionibus sacerdotum vel servorum dei, in quo nostris auribus fuerint prolatae, libenter annuimus et eas in dei nomine ad effectum perducimus. Igitur notum sit omnibus fidelibus nostris praesentibus et futuris, qualiter vir venerabilis Fortunatus Gradensis patriarcha, sedis sancti Marci evangelistae et sancti Hermacorae episcopus, serenitati nostrae petiit, ut tale beneficium circa dictam memoratam sanctam ecclesiam ex nostra indulgentia concedere et confirmare deberemus, quatenus sub immunitatis nomine tam ipse quam sacerdotes et reliqui nec non servi et coloni, qui in terris suis commanent, in Istria, Romandiola seu in Longobardia vel ubique quieto tramite vivere et residere debeant. Cuius petitionem eius servitio et meritis compellentibus denegare noluimus, sed pro mercedis nostrae augmento in dei nomine ita concessisse et in omnibus confirmasse cognoscite tam episcopia quam et synodochia vel ecclesias baptismales. Precipientes ergo iubemus, ut in vicis vel villis seu rebus vel reliquis quibuslibet possessionibus, undecumque praesenti tempore memoratus patriarcha iuste et rationabiliter vestitus esse dinoscitur, nullus iudex publicus iniuste ad causas audiendum vel freda exigendum nec mansiones seu paratas faciendum nec ullas redibitiones iniustas requirendum ingredere aut exactare paenitus praesumant, sed dum praedictus Fortunatus patriarcha advixerit, sub immunitatis nomine tam ipse quam eius successores et coloni ac servi, qui super terras suas commanent, vel reliqui homines sui valeant ex nostra indulgentia quieto tramite vivere ac residere, ita ut melius eis delectet pro nobis vel pro stabilitate regni nostri iugiter domini misericordiam exorare. Et ut haec auctoritas firmior habeatur vel per tempora melius conservetur, manu propria subter firmavimus et de anulo nostro sigillari iussimus.
Signum (M.) Caroli gloriosissimi imperatoris.
Hagdingus advicem Ercambaldi.
Data id. august. in sacro palatio nostro anno III Christo propitio imperii nostri [et] XXXIII regni nostri in Francia et XXVIII in Italia; actum Salcio.