Karl der Grosse bestätigt dem Kloster St. Denis die Schenkung seiner Schwester Gisla.
Datierung: 799 06 13
Ausstellungsort: Aachen
Karolus gratia dei rex Francorum et Longobardorum ac patricius Romanorum. Si ea, que a deum timentibus hominibus parentibusque nostris ad loca sanctorum venerabilium largita vel condonata esse noscuntur, oraculis nostris confirmamus, hoc nobis procul dubio ad aeternam beatitudinem et mercedis augmentum seu stabilitatem regni nostri pertinere confidimus. Ideoque notum sit omnium fidelium nostrorum magnitudini presentium scilicet et futurorum, qualiter illustris deo sacrata Gisla, dilectissima soror nostra, serenitati nostre suggessit, eo quod ipsa inspirante divina potentia aliquas res proprietatis sue ad monasterium sanctorum martyrum Dyonisii, Rustici et Eleutherii, ubi ipsi corpore requiescunt et ubi preest venerabilis Fulradus abba, tam pro se quam etiam pro salute animarum videlicet domni ac genitoris nostri Pippini quondam gloriosissimi regis et domne Bertradane genitricis nostre plenissima deliberatione delegasset. Et unde et ipsum testamentum donationis sue nobis ostendit ad relegendum, ubi continebatur, qualiter dedit ad ipsum locum villam nuncupatam Puciales sitam in pago Adrapatensi cum ecclesiis inibi constructis in honore sancti Vedasti vel aliorum sanctorum vel omnibus appendiciis suis ad se pertinentibus infra pagum ipsum, Guntbodocurte, Postinevillare, Berninocurte et in Linarias seu et in Hodricio, in pago vero Vermandensi in Magrastovilla et in pago Ambianensi Fricionecurte et in Agnonecurte nec non in pago Cameracensi loco qui dicitur Waliu. Sed pro integra firmitate petiit a celsitudine nostra, ut, quicquid ipsa cum equitatis ordine in supradictis locis ad prefatum monasterium sanctorum martyrum iuste et rationabiliter delegavit, pro communi mercede et pro eterna remuneratione nostris oraculis cedere et confirmare deberemus. Cuius peticionem pro divino intuitu denegare noluimus, sed in elemosina nostra ita nos concessisse et in omnibus confirmasse cognoscite. Precipientes ergo iubemus, quod perpetualiter mansurum esse volumus, ut inspecto ipso testamento donationis sue, sicut inibi declaratur, deinceps per hanc nostram auctoritatem atque confirmationem suprascriptus vir venerabilis Fulradus abba suique in perpetuum successores, qui fuerint rectores per tempora ipsius sancti loci, iure firmissimo teneant atque possideant, quatinus in luminaribus ipsius ecclesie seu stipendia servorum dei omnia, sicut supra diximus, perhenniter proficiant in augmentis. Et ut hec auctoritas firmior habeatur et per tempora melius conservetur, manu propria subter firmavimus et anulo nostro signari iussimus.
Signum (M.) Karoli gloriosissimi regis.
Genesius advicem Ercanbaldi scripsit et recognovit.
Data idus iunii anno XXXI et XXVI regni domni nostri Caroli; actum Aquis palatio; in dei nomine feliciter amen.