Karl der Grosse nimmt das ihm übereignete Kloster Aniane in seinen Schutz und verleiht Immunität mit freier Abtswahl.
Datierung: 792 07 27
Ausstellungsort: Regensburg
In nomine sancte et individue trinitatis. Carolus gratia dei rex Francorum et Langobardorum ac patricius Romanorum. Maximum regni nostri in hoc augere credimus munimentum, si beneficia oportuna locis aecclesiarum benivola devotione concedimus ac domino protegente stabiliter perdurare conscribimus. Igitur notum sit omnibus episcopis abbatibus comitibus vicecomitibus vicariis centenariis iudicibus seu omnibus fidelibus presentibus scilicet et et futuris, qualiter vir venerabilis Benedictus abba ex monasterio, quod ipse novo opere in re proprietatis a fundamentis in honore domini dei ac salvatoris nostri Iesu Christi seu sanctae semperque virginis eiusdem dei genitricis Marie seu aliorum sanctorum hedificavit in loco nuncupante Aniano in pago Magdalonense subtus castro Monte Calmense, ad nostram accessit clementiam et predictum monasterium cum omnibus rebus et ornamentis aecclesiae seu appendiciis vel adiacentiis suis in manibus nostris plenissima deliberatione visus est delegasse et ipsum sanctum locum sub nostra defensione atque dominatione ad regendum nobis visus est tradidisse. Idcirco ad eius petitionem talem pro aeterna retributione beneficium erga ipsum sanctum locum visi fuimus indulsisse, ut in ecclesiis et locis vel agris seu reliquis possessionibus ipsius monasterii, quas moderno tempore per nostram donationem ac confirmationem seu ceterorum fidelium iuste possidere videtur in quibuslibet locis, quicquid ibidem propter divinum amorem collatum fuit queque aetiam deinceps in iure ipsius sancti loci aut per nos aut per alios voluerit divina pietas augeri, precipientes iubemus et anatematizamus, ut nullus comes neque episcopus aut ulla iudiciaria potestas ad causas audiendas vel freda exigenda aut mansiones vel paratas faciendas aut fideiussores tollendos nec homines ipsius monasterii tam ingenuos quamque servos, qui supra terram memorati monasterii residere videntur, distringendos nec ullas redibitiones aut inlicitas occasiones requirendas aut ullum omnino censum inquirendum ullo umquam tempore ingredi audeat vel exactare presumat, sed hoc ipse abbas vel successores sui aut monachi memorati loci presentes scilicet et futuri propter nomen domini sub integrae emunitatis nomine absque cuiuslibet inquietate aut contrarietate valeant dominare et nulli umquam homini pro qualicumque re nullum censum omnino audeant impendere, set ipsum sanctum locum sub nostra defensione atque dominatione volumus constare. Statuentes ergo iubemus, ut neque vos neque iuniores seu successores vestri vel quislibet ex iudiciaria potestate in aecclesiis et locis vel agris seu reliquis possessionibus suprascripti monasterii vel de omnibus, que supra scripta sunt, nullo umquam tempore inquietare aut exactare presumatis, sed quod nos propter nomen domini et aeterna remuneratione ad iam fatum monasterium indulsimus, perennis temporibus proficiat in augmentis. Et quando quidem divina vocatione suprascriptus venerabilis Benedictus abbas vel successores eius de hac luce ad dominum migraverint, qualem meliorem et nobis per omnia fidelem ipsa
sancta congregatio de suprascripto monasterio aut de qualicumque loco voluerint eligere abbatem, qui ipsam sanctam congregationem secundum regulam sancti Benedicti regere valeat, per hanc nostram auctoritatem et permissa indulgentia licentiam habeant et ubicumque voluerint ordinari aut ipsi aut monachi ipsorum vel a quolibet pontifice, ex precepto et consensu nostro potestatem habeant, quatinus ipsi servi dei, qui ibidem deo famulari videntur, pro nobis ac coniuge proleque nostra et stabilitate tocius regni a deo nobis commissi vel conservandi attentius domini misericordiam exorare delectentur. Et ut hec auctoritas confirmationis nostri futurisque temporibus domino protegente valeat inviolata manere, manu propria signaculis subscripsimus et anuli nostri impressione adsignari iussimus.
Signum (M.) Karoli gloriosissimi regis.
(C.) Bartolomeus notarius advicem Hludowici recognovi.
Data VI kal. aug. anno [XXIIII] et nono decimo regni nostri; actum in Ruganesburg palatio nostro publico; in dei nomine.