Karl der Grosse verleiht dem Kloster Flavigny Zollfreiheit und schenkt den Ertrag der Zölle auf dessen Besitzungen.
Datierung: 775 05 03
Ausstellungsort: Diedenhofen
Karolus gratia dei rex Francorum et Longobardorum ac patricius Romanorum vir illuster. Si petitionibus sacerdotum, quod ad profectum ecclesiarum pertinet, devota mente praestamus, retributorem omnium bonorum Jesum Christum ex hoc nos habere confidimus...... petiit celsitudinem nostram venerabilis vir Manasses abba de monasterio quod vocatur Flaviniacus in pago Alsinsi, quod est constructum in honore domini nostri Jesu Christi vel sancti Petri et sancti Praeiecti, ut omne teloneum infra regnum nostrum de negotiantibus eorum vel de omnibus hominibus eorum, qui per ipsam casam sperare videntur, [..... ] ut nullum teloneum dare non debeant in civitatibus marcatis vicis villis pontis portubus nec ipsi monachi seu negotiantes eorum et homines eorum, qui per ipsam casam sperare videntur, nec teloneum nec pontaticum nec rotaticum nec barganaticum nec pulveraticum nec mutaticum nec ripaticum nec salutaticum nec laudaticum nec travaticum nec de hoc, quod homines eorum ad dorsum portare videntur; et quidquid exinde ad partem fisci nostri reddere debent, totum in luminaribus vel in stipendia monachorum et susceptionem pauperum in nostra elemosina ad ipsam casam dei concessimus, quas nunc et moderno tempore concessum atque indultum esse volumus, ut, sicut diximus, de omnibus teloneis in civitatibus vicis villabus pontis portubus pontatico rotatico barganiatico pulveratico mutatico ripatico salutatico laudatico trabatico et de hoc, quod homines eorum ad dorsum portant, et de negotiantibus eorum vel de omnibus hominibus eorum devote pro ipsa casa dei sancti Petri et sancti Praeiecti omni tempore perpetualiter concessimus atque indulsimus. Similiter concedimus ad ipsam casam dei in villabus eorum seu super terraturiis eorum vel cinctus eorum infra aut ad foris ibidem advenerint et quidquid ibidem negotiatum fuerit, omne teloneum, sicut superius diximus, ad ipsam casam per nostram praeceptionem concessimus. Et ut haec praeceptio firmior habeatur et per tempora melius conservetur, manu nostra subter decrevimus adfirmare.
Data die V non. mai. et scripta per Radonem apud Theodonem villam palatio publico, anno VII praedicti domni nostri Karoli.