L'abbé de Gorze concède pour sept années à certains hommes un clos à la source du ruisseau de Gorze.
Datierung: 977
Quotiens dignum quid memorie geri demandaverit, cuiusque oportunitas negotii presentium posterorumque hoc idem utique noticie palam fiat, quod sollers in re huiuscemodi fieri censuit antiquitas, scriptis signando emulandi incumbit necessitas. Hoc itaque considerans, ego Odelbertus, annuente superni moderatoris gratia Gorziensis cenobii pauperibus Christi delegatus abbas, ac pro viribus ab ipso subrogatis, loco memorato eiusque incolis, undecumque gentium obsequio divinitatis coasscitis prodesse magis quam presse in omnibus desiderium habens, profectui quoque omnium hominum, maxime nostre potestati subiectorum, nobisque fideliter obsequentium congratulans, insuper et vicem fidelitati eorum recompensare pro posse satagens, concessi hominibus his quorum hec sont nomina: Angelerus, Tietdinus, Constantius, Albencus, Savowardus, Harduinus, Evraldus, Nicherus, Seumaldus, Hunlaicus, Odolbertus, Johannes, Evorinus, Grimbaldus, Harmannus, Lambertus, Willivertus, item Harmannus, cum consensu et favore fratrum nostrorum prepositorum, Teutheri videlicet, Adelgeri, Herchengeri, Saleconis, Beraldi, Angelramni decani, Haderici cellerarii, Volchradi portarii, ac reliquorum diverse etatis, clausum quod capiti fluvioli Gorzie incombit, ad obedientiam attinens ipsius portarii, a predecessore suo Beraldo memorato iampridem deplantatum, ea tenoris gratia ut in septem annorum curriculo nil sumptuum a nobis accipientes, sed de suis propriis, omnia necessaria, taro in victualibus quam in cultura, subministrantes, quicquid in revolutione annorum predictorum reperiri poterit fructuum, liberi ex integro sibi vendicandi potestatem obtinebunt. Septem autem annorum decursis temporibus, uberiorem uniuscuiusque vinee medietatem nostro mancipabimus iuri, ipsis partem reliquam iure hereditario ad posteros suos transmittendam relinquentes, hac conditione interposita ut, si cogente qualibet necessitatis inopia, medietates ipsas a nobis sibimet perpetuo concessas distrahere fuerint compulsi, nullius alterius precium nostro audeant preferre, nisi forte quod absit aut possibilitas aut animus non fuerit nobis redimendi. Ceterum, quoniam ipse defectus humane condicionis permanere quemque mortalium diu non sinit, precamur successores nostros, patres futuros cui ex voluntate Dei presumus loci, ut causa amoris Dei, quemadmodum sua a sibi succedentibus servari que iuste decreverint statuta, nostra eque super hac re non convellant decreta, qui revera oil sanius minusque aut maius excogitare valuimus. Ut autem hec descriptionis sceda firmum perpetuitatis obtineat robur, non modo nostra nostrorumque, verum etiam senioris nostri Deoderici, Mettensis episcopi, maiorisque ville nomine Lancheri, et scabiniorum auctoritate firmavimus. Actum anno quo supra.