Godo affranchit le serf Ragenerus avec toute sa famille, à charge de payer un tribut annuel pour l'entretien du luminaire de l'autel de saint Gorgon, en l'abbaye de Gorze.
Datierung: 949
Ausstellungsort: Gorze
Cum fragilitati humane varii casus accidunt, et unusquisque finem vite sue ignorat, ita agere debet quasi omni hora se cogitet hinc transiturum, ne interveniente negligentia, circa finem imparatus, sine aliquo respectu boni operis de seculo migret; et quamdiu in sua potestate homo consistit, preparare sibi viam salutis debet, per quam ad eternam beatitudinem pervenire valeat. Quapropter ego in Dei nomine Godo, cogitans pro Dei intuitu et anime mee salute ut veniam delictorum meorum in futuro adipisci merear, et in die futuri examinis ante tribunal Christi adsistens, illam desiderantissimam Domini vocem audire valeam : « Venite, benedicti patris mei, percipite regnum, » absolvo famulum ac servum meum Ragenerum statim ab hodierna die, et post decessum meum, patrem et matrem, fratres et sorores predicti Rageneri, quorum nomina hec : Sarowardus, Aldrada, Hardoinus, Gelsinda, lsengardis, Erildis. Similiter absolvo ab omni vinculo servitutis, ut bene ingenui atque securi permaneant, tanquam si ab ingenuis parentibus fuissent procreati vel nati, eandemque pergant partem quamcumque voluerint, habeantque portas apertas; ea tamen ratione ut ad altare sancti Gorgonii, cui eos trado atque transfundo, quod est in Gorziensi monasterio, singulis annis, ad festivitatem predicti martyris, que est V idus septembris, unusquisque illorum ad luminaria concinnanda denarios quinque persolvat, femina vero duos, et deinceps nec michi, nec successoribus meis, ullum debeant noxie conditionis servitium, sed omnibus diebus vite illorum, cum filiis et filiabus quos procreaverint, sub certa plenissimaque ingenuitate liberi existant. Suum vero peculiare alodium, scilicet quod iacet ad curtem Adelheri, et omnia que habent aut abhinc adquirere potuerint, propter malorum hominum insidias, iam dicto monasterio subicimus; illis tamen iure legitimo sit concessum. Si quis vero de heredibus vel proheredibus meis hanc ingenuitatem quod minime fieri credo irrumpere temptaverit, caveat ut proinde iram Dei non incurrat, presensque ingenuitas omni tempore firma et stabilis permaneat stipulatione subnixa. Actum in Gorziensi monasterio, anno ab incarnatione Domini DCCCCXLIX, indictione VII, epacta XVIII, concurrente VII, anno XIIII Ottonis imperatoris, regnante domino nostro Jesu Christo, cuius regnum et imperium sine fine permanet in secula seculorum. † Signum Godonis, qui hanc cartulam ingenuitatis fieri et firmare rogavit; Signum Raginberti ; Signum Teudoldi; Signum Albrici; Signum Teudini ; Signum Teodonis; Signum Eudonis; Signum Wiperti ; Signum Gihardi ; Signum domni abbatis Aginaldi ; Signum Johannis prepositi; Signum Folberti; Signum Ysaac; Signum Huberti; Signum Teuteri ; Signum Lodouini; Signum Bergerimni. Ego Geremannus, indignus levita, iubente domno abbate nostro Agenaldo, hanc cartulam scripsi.