Le pape Léon VII confirme toutes les donations faites à l'abbaye de Gorze par l'évêque de Metz Adelbero.
Datierung: 938 06
Leo, episcopus, servus servorum Dei, Agenaldo, venerando abbati cenobii videlicet Gorzie, in honore beatorum apostolorum Petri et Pauli eximiique martyris Gorgonii dudum constructi, et per te tuis successoribus in perpetuum. Convenit apostolice pietati cunctarum ecclesiarum sollicitudinem gerere, et sicut sancta Romana sedes per beatum Petrum caput et princeps est ceterarum, ita quibuslibet sicut propriis menbris suffragium, ubi fore indigent, impertiri. Quapropter id quod a nobis postulas, fili karissime, libenter accipiens, predictum monasterium, cum omnibus rebus ad se pertinentibus, vel quas filius noster Adalbero, sancte Mettensis ecclesie episcopus, eidem loco benivola voluntate de sua ditione concessit, ita per hoc apostolice auctoritatis privilegium, vel tibi, vel tuis successoribus omnique fraternitati confirmamus, ut testamentum illud quod exinde vobis isdem coepiscopus et filius noster, prefatus Adelbero, iam pridem fecit, stabile et inconvulsum perduret, neque successores illius, neque persona quelibet aliqua predictas res, vel quicquid ad vestram ditionem pertinet, inquietare vel usurpare presumat. Post tuum vero discessum, habeant monachi licentiam, vel de semetipsis vel de alio cenobio, qualemcumque personam sue saluti plenius convenientem reppererint, sine cuiuslibet, aut episcopi, aut alterius gradus contradictione, abbatem preferre. Adalberonem sane, qui locum ilium vobis ad reparandum ordinem monasticum tradidit, cum omnibus religiosis principibus, vel quibuslibet aliis christianis, qui loco vel fratribus adiutores fuerint, in Domino gratificamus, et ut ipsi a sanctis apostolorum principibus adiuvari mereantur et, quantum divina pietas concesserit, absolutos esse optamus. Et contra, si quis tam pernitiosus fuerit ut fraternitatem illam, vel omne quicquid ad eos pertinet, inquietare aut usurpare presumpserit, hunc talem, sub anathematis vinculo, nisi ad satisfactionem resipuerit, innodamus atque excommunicamus. Ut autem hec nostra auctoritas firmius habeatur, et in futuros dies illibata perduret, hanc signi nostri bulla facimus insigniri, et propria manu nostra roborari. Scriptum per manum Leonis, scriniarii sancte Romane ecclesie, in mense iunio, anno ab incarnatione Domini DCCCCXXXVIII, indictione XI, epacta XVII, concurrente VII, anno III Ottonis regis. Bene valete.