Adelbero, évêque de Metz, restitue à l'abbaye de Gorze le domaine de Moivron.
Datierung: 936
In omni negotio equitatis norma semper sectanda est, verum et cuiusque rei proclamatio, iustis ventilata querimoniis, quo fine claudatur dignum ducimus memorabilibus assignari scriptis. Idcirco ego, ac si indignus, Adelbero, sancte ecclesie Mettensium episcopus, notum manere volo qualiter proclamationibus Agenoldi, venerandi abbatis, simulque totius memorande ipsius congregationis cenobio sancti Petri digne Deo famulantibus commonitus sum, scilicet pro nonnullis suorum rebus ad ipsum dictum cenobium pertinentibus, precipueque propter villam Montem Vironis dictam, quam legitima donatione necne verenda obtestatione sub testamento conscriptionis a predecessore nostro, videlicet beate memorie Rodgingo, ostendebant prefato loco traditam, atque veridico testimonio affirmabant tenuisse ipsam in proprios usus usque tempore predecessoris nostri Wigirici episcopi, qui illam ordine precario a comunione fratrum semovit, quam videlicet, quia noster fidelis Folmarus in beneficio habebat acsi aliter quam rectitudo mandat, totiens dissimilando distuli ; verum proprio libitu sola difficultas resistebat. Nunc vero, favente Deo, eam que fuerat abiecta impossibilitate, et quia locum implendi adeptus sum, cum consensu predicti fidelis nostri Folmari, cui et comcammium reddidi, parique nostri advocati comitisque palatii condictu, reliquorumque fidelium nostrorum consultu, memorate proclamationi venerabilis abbatis satisfeci, non modo quasi spontaneum donum donando, verum alterius scilicet beati Rogingi proprium utque dictum in perpetuum donativum reddendo, utinam et per hoc nostrum proveniat premium, quo semper habeant secundum legitimam predecessoris nostri donationem, humili deposcens prece omnes successores nostros, presentes ac futuros ecclesie fideles, ut pro tanti viri memoria simulque veneratione, et pro nostre pravitatis condonatione, inconvulsum manere sinant, utque potiori teneantur examine eandem quam et noster predecessor subnectimus obtestationem, scilicet monentes, per trine majestatis venerationem, ut quemadmodum volunt sua, ita nostra confirment, et corroborent iusta diffinitione promulgata. Quo autem et super hoc prefatus abbas reliquusque ipsius cenobii ordo certus securusque permaneat, hoc testamentum redonative rei iussimus fieri, manu nostra propria simulque fidelium nostrorum utriusque ordinis roboratum. Adelbero, sancte Mettensis ecclesie humilis episcopus, subscripsit †. † Signum Everini primicerii; S. Folcradi † archidiaconi; † Sigiboddonis custodis; Waldradi cantoris; † Teuthardi presbiteri; † Riwaldi presbiteri; † Rainulfi presbiteri; † Dagerici presbiteri ; † Wolfridi presbiteri ; Tanchradi presbiteri ; Rampodi presbiteri ; † Lamperti presbiteri ; † Erchenulfi presbiteri; † Dodonis presbiteri; † Enalui presbiteri; † Ursonis diaconi; Wigirici diaconi; Adelardi diaconi; †item Adelardi diaconi; † Betonis diaconi ; † Girardi diaconi ; † Hardowini subdiaconi; † Girbaldi subdiaconi ; Volfridi subdiaconi ; † Rodingi subdiaconi ; † Wigirici acoliti ; † Conradi acoliti ; † Gonteri acoliti ; † Hamedei, comitis palatii et advocati; † Odacari comitis; † Teutberti; † Roberti; † Lamberti; † Reinrici; † Folcradi; † Lodowini. Ego Adelardus cancellarius scripsi et subscripsi.
Actum anno quo supra.