Wigiricus, abbé de Gorze, donne à son monastère l’église de Conflans-en-Jarnisy, et des biens audit Conflans, à Fey et à Verny, à condition de les recevoir en précaire dudit monastère, en même temps que l’église de Moivron et ses dépendances.
Datierung: 914
Ausstellungsort: Verdun
Cum fragilitati humane vite varii casus accidunt, et unusquisque finem vite sue ignorat, ita agere debet quasi omni hora cogitet se hinc transiturum, ne interveniente negligentia circa finem imparatus inventus, sine aliquo respectu boni operis de seculo migret, nisi, dum in sua potestate consistit, preparet sibi viam salutis, per quam ad eternam valeat beatitudinem pervenire. Idcirco ego in Dei nomine Wigiricus, abbas, cogitans pro Dei timoris intuitu et anime mee salute ut veniam delictorum meorum in futuro adipisci merear, et in die futuri examinis ante tribunal Christi adsistens illam desiderantissimam Domini vocem audire valeam: «Venite benedicti partis mei, percipite regnum,» dono aliquid de rebus proprietatis mee ad partem Gorziensis monasterii sancti Petri seu sancti Gorgonii, cui ego ipse, ex permissu senioris mei domni Roberti, sancte Mettensis ecclesie venerabilis episcopi, preesse videor, donatumque in perpetuum esse volo et promptissima voluntate confirmo per cartulam testamenti; hoc est in pago Wabrinse, in comitatu Virdunensi, in villa que dicitur Confluentis, super flufium qui vocatur Horna, ecclesiam I in honore sancti Martini confessoris Christi dedicatam, ad quam aspicit mansus et sors I; item ibi mansum indominicatum, cum omni edificiorum structura, terras quoque arabiles indominicatas ad ipsum mansum aspicentes, in quibus possunt seminari de annona inter utrasque sationes modios CL, prata vero ad collingendum de feno carratas XL, de silva ad aginandum pocos L, et ferinarium I, itemque ibi mansos et sortes ingenuiles VI, et quicquid ad eos aspicit, et mancipia XXX; et in alio loco, in pago Mettinse, in comitatu Gerbercinse, in Fadilico vocata villa, mansum indominicatum, cum edificis et arboribus diversi generis, et alios mansos duos sine edificiis, de terris vero arabilibus quicquid in ipsa fine, sive ibi prope in fine Verniaca, habui, de vineis quoque in quivus possunt colligi de vino modii CCC, prata vero ad colligendum de feno carratas XXX, de silva ad saginandum porcos XL, videlicet quicquid in his supradictis locis visus fui habere, in ecclesia, mansis, edificiis, mancipiis, vineis, campis, pratis, silvis, cultis et incultis, pascuis, aquis aquarumve decursibus, totum per omnia et ad integrum ad partem prefati monasterii sancti Petri seu sancti Gorgonii, atque ad illos fratres ibidem Deo militantes, dono, trado atque transfundo in Dei nomine perpetualiter ad possidendum. Ita tamen ut tam ipsas res, quas dedi, quam et ipsas alias res de ratione ipsius ecclesie sancti Petri seu sancti Gorgonii, hoc est in pago Salninse, in comitatu Scarponinse, in Monte Virone nuncupata villa, ecclesiam I in honore sancti Gorgonii consecratam, et quod ad eam aspicit, mansum vero indominicatum cum edificiis desuper statutis, terras quoque indominicatas arabiles ad seminandum inter ambas sationes modios CXXV, vineas vero in quibus possunt colligi CCC modii vini, prata autem ad colligendum fenum karratas XXX, et de silva ad saginandum porcos L; alios quoque mansos et sortes ingenuiles VIII, et serviles XVI, cum omnibus suis appendiciis, videlicet quicquid in supradicta villa visum est habere de ratione sancti Petri seu sancti Gorgonii, in ecclesia, mansis, edificiis, mancipiis utriusque sexus, vineis, campis, pratis, silvis, pascuis, cultis et incultis, aquis aquarumve decursibus, totum per omnia et ad integrum, quandiu ego vixero, per beneficium memorati presulis seu successorum eius, de parte sancti Petri vel sancti Gorgonii, more precario, quieto ordine, valeam habere vel excolere, iureque legitimo uti. Et proinde annis singulis in festivitate sancti Petri, que est III kalendas julii, ad partem ipsius altaris in censum de argento solidos V solvere debeam ; et si de ipso censu negligens apparuero, cum lege illum restituam, sed propterea meam precariam non perdam. Post meum quoque discessum, quando quidem Deus voluerit, prefate omnes res date scilicet et accepte, absque alicuius contradictione vel iudicis assignatione, ad partem memorati monasterii omnimodis revertantur stipulatione subnixa. Actum in Virduno, in mallo publico, coram Ricoino comite, anno ab incarnatione Domini DCCCCXIIII, indictione II, epacta XXII, concurrente V, anno III regnante domno Karolo rege in regno Lotarii quondam regis feliciter. † Signum Wigirici abbatis; † Signum Ramberti; † Signum Ricoini comitis; † Odilberti; † Signum Blidulfi; † Signum Teutfridi ; † Signum Bernachri; † Signum Volfridi; † Signum Volfaldi. Ego Godebertus, diaconus, ad vicem Coillardi presbiteri atque cancellarii, scripsi.