Urkundenbuch des Klosters Fulda; Teil: Bd. 1., (Die Zeit der Äbte Sturmi und Baugulf) (Ed. Stengel) Nr. 68
Datierung: 774 09 24
Carolus gratia dei rex Francorum vir inluster omnibus fidelibus nostris tam presentibus quam futuris. Maximum regni nostri augere credimus munimen, si beneficia oportuna loca ecclesiarum benivola deliberatione concedimus ac domino protegente stabiliter perdurare confidimus. Igitur cognoscat magnitudo seu utilitas vestra, quomodo nos ad peticionem venerabile viro Sturmione abbati de monasterio Vulda, ubi ipse preciosus domnus Bonefatius corpore requiescit, in pago Graffelt super fluvium da ipsius Fulda, talem pro reverentia ipsius sancti vel pro eterna retribucione beneficium visi fuimus concessisse, ut in villas ecclesie domni Bonefatii, quas moderno tempore aut nostro aut cuiuslibet munere habere videtur vel quas deinceps in iure ipsius sancti loci voluerit divina pietas amplificare, ut nullus iudex publicus ad causas audiendum vel freda exigenda quoquo tempore non presumat ingredere, sed hoc ipse predictus abba vel successores sui propter nomen domini sub integre emunitatis nomine valeant dominare. Statuentes enim, ut neque vos neque iuniores aut successoresque vestri aut ulla publica iudiciaria potestas quoquo tempore in villas ubicumque regni nostri ipsius ecclesie aut regia aut privatorum largitate collatas aut qui inantea fuerint collaturas ad audiendas altercationes ingredere aut freda exigere nec mansiones aut paratas vel fideiussores tollendum non presumant; sed quicquid exinde de ingenuis aut de servientibus ceterisque nationibus, que sunt infra agros vel fines vel per terras predicte ecclesie commanentes aut de freda aut undecumque poterit sperare, ex nostra indulgentia pro futura salute in luminaribus ecclesie sancti Bonefatii per manus agentum eorum proficiat in augmentum. Et quod nos propter nomen domini et anime nostre remedium seu nostra prosequente progenie plena devotione indulsimus, nec regalis sublimitas nec cuiuslibet iudicium seva cupiditas refragare temptetur, et ut presens tam presentis quam et futuris temporibus inviolata deo adiutore firmiter permaneat. Et ut hec emunitas firmior habeatur et per tempora melius conservetur, de annulo nostro subter sigillavimus. Signum Caroli gloriosissimi regis. Rado ad vicem Hitherii recognovit.