Urkundenbuch des Klosters Fulda; Teil: Bd. 1., (Die Zeit der Äbte Sturmi und Baugulf) (Ed. Stengel) Nr. 12
Datierung: [751 Frühjahr bis Sommer?]
Reverentissimo fratri, immo dilectissimo consacerdoti, Optato abba et universae sanctae congregationi sub cura illius regularis vitae normam custodienti Bonifatius sine praerogativa meritorum nominatus episcopus obtabilem in Christo caritatis salutem. Venerandam sanctitatis vestrae clementiam intimis obsecramus praecibus, ut nos indignos vobiscum in unitate fraternae dilectionis et societatis spiritalis suscipere et habere dignemini, ut una sit inter nos et fides mentium et pietas actionum, et-sicut princeps apostolorum Petrus hortatur dicens: „Ante omnia mutuam in invicem caritatem habete, quia caritas operit multitudinem peccatorum“, et ipsa veritas dixit: „In hoc cognoscent omnes, quia mei estis discipuli, si dilectionem habueritis ad invicem“, et similiter Paulus apostolus admonet dicendo: „Alter alterius honera portate et sic adinplebitis legem Christi“, et alibi: „Finis enim precepti est caritas de corde puro et conscientia bona et fide non ficta“-et ut vestra fraternitas, in spiritali regulariter vita vivens, in pacifica tranquillitate fraterne concordiae pro nostra fragilitate exorare dignetur, „ut sermo domini currat et clarificetur“, „ut“ iuxta dictum apostoli „liberemur ab inportunis et malis hominibus“ et a temtationibus malignorum spirituum et tribulationibus adversariorum, ut lux evangeliorum gloriae Christi et via vitae, quam populis et gentibus ostendere et ipsi pergere debemus, nobismet ipsis non obtenebrescat nec abscondatur. Diligenter quoque deprecamur, ut familiaritas fraternae caritatis inter nos sit, et pro viventibus oratio communis et pro migrantibus de hoc saeculo orationes et missarum sollemnia celebrentur, cum alternatim nomina defunctorum inter nos mittantur. Interea, si quid fraternitas vestra nobis mandare ad perficiendum vel ad dicendum dignata fuerit, voluntatis vestrae desiderium in omnibus adinplebimus. Agite, ergo de ac petitione nostra, ut in alto caelorum culmine mercedis vestrae premia in superna curia angelorum clarescant et crescant. Longevam ac valentem et almis viribus proficientem et suavissimis operum et verborum floribus odorantem beatitudinem vestram perenniter salvator mundi custodiat †.