Renard, chevalier, donne à l'abbaye de Marmoutier l'église
de Saint-Martin de Daumeray, le cens, les autres coutumes et toute la
viguerie dudit Daumeray, les gages de bataille, deux métairies, des vignes,
des prés et la forêt de Châtillon. - Eudes et ses fils souscrivent.
Datierung: 1020-1037
Quisquis divine retributionis flagrat amore, quatenus post devictum hujus transitorii seculi certamen, mereatur voce piissimi judicis optantissima quiete consolari, consequens atque dignissimum credimus et confitemur ut, et hic fideli sanctione, misericordia Dei cooperante, provehi ad incrementa sancte conversationis atque devotionis spe et ambitione tendat, et quicquid aut fastus inique vite contulerit, aut inertia humane imbecillitatis, ut assolet fieri mortalibus, indixerit, provectu et supplemento piissimarum precum sanctorum sublevetur. Itaque ego, in Dei nomine, Rainardus, vir armis militaribus deditus, reminiscens meorum multitudinem peccatorum et ultimi judicii diem fortiter expavescens, atque cum electis quibus Deus in illa dicturus est die: Venite, benedicti patris mei, percipite regnum quod vobis paratum est, aggregari desiderans, concedo Deo et Sancto Martino in loco Majoris Monasterii aliquid de rebus meis, quod mihi a parentibus meis precedentibus dimissum est, videlicet ecclesiam Sancti Martini de Dalmariaco, et censum, et alias consuetudines de burgo qui circa ecclesiam edificatur, et totam vicariam, et bellum si ibi fuerit arramitum, et duas meditarias, et cuncta prata que ibi juxta cimiterium in meo dominio habebantur, et duos arpennos, et dimidium de vineis dominicis, et de aliis vineis totum censum quem in meo dominio tenebam, et silvam que appellatur Castellonium. Sed unus meus caballarius, Fulcradus nomine, si in ipsa silva glandem habuerit, tertium denarium de pasnatico habebit, et nihil amplius, quoniam in dominio monachi Sancti Martini erit et apem de silva habere et leges de forfactis que ibi facta fuerint. Si vero monachus totam silvam succidere et arare voluerit, in sua deliberatione erit, et caballarius ultra nihil habebit de terra. Si quis autem de heredibus meis, aut aliqua intromissa persona, contra hanc donationem quam libera mente et propria voluntate, de rebus mihi a progenitoribus concessis, facio, aliquam calumniam monachis, post meum decessum, inferre voluerit , nisi cito humiliatus ad eos proferens emendationem venerit, inprimis Dei omnipotentis et perpetue virginis Mariae atque omnium electorum Dei iram incurret, et cum Juda traditore atque Simone mago vivus in inferrum descendens semper ibi ardebit, ac deinde irritum fiat quod vindicat. Ut autem hujus donationis mea auctoritas pleniorem optineat firmitatem, manu propria eam sub signo sancte crucis firmavi, manibusque senioris mei Landrici Balgentiacensis, in presentia comitis Gausfredi necnon multorum virorum fidelium, quorum nomina infra sunt scripta, affirmare rogavi.
S. Rainaldi. S. Landrici. S. Johannis, filii ejus. S. Lancelini, filii ejus. S. Hervei, filii ejus. S. Fulcradi, hominis ejus. S. Godefridi, hominis ejus. S. Rainaldi Farsiti. S. Ascelini. S. Hilgoddi. S. Teoderici Gaillardi. S. Guarnerii prepositi.
S. Odonis comitis. S. Theodbaldi comitis. S. Stephani comitis. S. Fulconis comitis. S. Gausfredi comitis. S. Huberti episcopi. S. Berengerii.
S. Gauzlini decani.