La comtesse Berthe et ses fils confirment la donation de
biens faite par Eudes I. pour la construction de l'abbaye de
Bourgueil.
Datierung: 996
Ausstellungsort: Blois
Notitia rei gestae qualiter, anno incarnationis dominicae DCCCCXCVI , accedens Deo amabilis Pictavorum comitissa Emma, ante presentiam venerabilis comitissae Berthae, humiliter deprecata est quatinus donationes quas olim senior suus piae recordationis, Odo comes, de curti Burguliensi ad monasterium inibi construendum regi Christo et inclito clavigero apostolorum Petro, per seriem quartarum concesserat, sua filiorumque suorum Teobaldi scilicet atque Odonis auctoritate confirmaret. Cujus petitionem memorabilis comitissa Bertha unacum filiis suis congrua devocione suscipiens, toto cordis affectu assensu praebuit. Igitur, pro amore omnipotentis Dei sanctorumque omnium veneratione, et senioris sui dulcis memoriae , comitis Odonis, peccatorum omnium remissione, concessit sanctae et individuae Trinitati perpetuaeque virgini Mariae, necnon principi apostolorum Petro, prefatam curtim Burguliensem ad monasterium inibi perpetualiter adhabendum, cum omnibus adjacentiis et utilitatibus ad ipsam pertinentibus, totum et ad integrum sicut in memorati comitis Odonis autoritate conscriptum fertur, absque ulla prorsus contradictione, vel diminucione; nec ullo modo cujuslibet honoris vel dignitatis persona, in omni loco vel monasterii ipsius potestate ullam dominationem sive malam consuetudinem exercere audeat, et ne abbas ipsius loci terram monasterii ejusdem per seculares homines dispertiat, omnimodis interdixit. Verumtamen, si obitus ipsius cenobii abbatis extiterit, secundum patris Benedicti preceptum, talis qui aptus sit ad servandas animas a fratribus ipsius loci et utriusque ordinis christianis eligatur, atque jam presentiae jam dictae comitissae filiorumque ejus presentatus, absque ullius precii commercio ordinetur. Ne vero parvus videtur hujus bonae voluntatis effectus, eadem prefata comitissa regale preceptum implorans, impetravit quod si heredibus vel pro heredibus eorum sine aliqua intromissa persona hujus difinitionis contrarius extiterit , maledictio Domini super cum veniat et gloriam sanctorum non videat, sed cum diabolo et angelis ejus in inferno perpetualiter concietur.
Signum Teobaldi comitis. S. Odonis comitis. S. Bertae comitissae, matris eorum. S. Rothberti. Sig. item Rotberti. Sig. Hugonis vicecomitis. S. Alonis, fratris ejus. Sig. Gelduini. Sig. Richerii. S. Amalrici. Sig. Aefredi. S. Wicherii. S. Hucberti. S. Sanctionis. S. Radulfi. S. Arberti. S. Walchisi clerici.
Data haec est autoritas Blesis castro, anno Incarnationis dominicae DCCCCXCVI, indictione IX, regnante Hugone piissimo rege anno nono.