Datierung: [934–935 oder 930–931]
In nomine sancte et individue Trinitatis. Noverit omnium fidelium tam presentium quam et subsequentium industria, qualiter ego Buovo ob remedium anime mee et salvationem parentum meorum, patris scilicet mei Wolcmari et matris mee Richilde, ut ante Dei oculos facinorum nostrorum absolutionem mereamur invenire, trado atque transfundo perpetualiter habendum monasterio Epternaco dictum ad usus fratrum Deo sanctoque Willibrordo famulantium quandam proprietatis mee villam Wilre dictam, quam predictus genitor meus cum convenientia matris mee illuc iam pridem in elemosinam sui tradiderunt cum appendiciis illuc aspicientibus, scilicet vineis, curtis, casis, pratis, pascuis, campis, silvis, aquis aquarumve decursibus, molendinis, mobilibus et immobilibus simul cum ecclesia ibidem constructa, ea videlicet conditione, ut secundum parentum meorum instituta usibus vite mee et fili mei, si forte matrimonio coniunctus posteritatis successum consecutus fuero, deserviat. Post quorum discessum ad servitium fratrum absque ullius contradictione redeat. Et ut hec firmiora sint, et ne quis hanc traditionem infringere violenter audeat aut violare presumptuose valeat, in presenti mansum unum de ipsa curte cum mancipiis et cum salica decimatione mea in vestituram per manus amicorum meorum trado. Si quis autem posterorum meorum aut coheredum hanc traditionem infringere voluerit, iram Dei omnipotentis et sancti Willibrordi, nisi peniteat, miserabiliter incurrat. Actum anno XII regnante Henrico rege.