Datierung: [930–931 oder 926–927]
In Dei nomine. Notum sit universis sancte matris videlicet ecclesie fidelibus tam presentibus quam et futuris, qualiter ego Beringaudus, ab ineunte puericia in Epternaco sub canonicali norma enutritus monasterio posteaque divina preordinante dispositione eidem rector constitutus congregationi, ob amorem Dei remediumque anime mee quoddam predium, quod germanus et antecessor meus huiusque loci provisor Volcaudus nomine in villa et in marca Lutherburne dicta precio ab heredibus acquisito michi prerogaverat, sancto altari, quod sanctus Clemens Willibrordus in nomine et in honore sancte et individue Trinitatis edificavit et dedicavit et sub quo ipse Deo iubente feliciter requiescit, per manus duorum nobilium Odradi scilicet advocati ac Ramberti legitime tradidi, hoc est iugerum unum, siticum I, locum molendini I vel quicquid michi eius donatione in vico et in confinio Epternacensi devenit. Insuper etiam quicquid postea predii ego ipse in prefato oppido Lutterburne dicto vel in omni Epternacensi vico et in confinio laboribus meis acquisivi vel condigno precio meo ab heredibus mercatus sum tam terris aratoriis quam in pratis, pascuis, silvis, campis, vineis, aquis aquarumve decursibus, totum predicto sancto altari per manus prenotatorum nobilium legitima traditione tradidi, ea scilicet ratione ut post discessum meum idem predium iuri stipendioque cedat congregationi, habeantque potestatem utendi istud ut velint. Si quis autem heredum meorum in hac congregatione exstiterit, qui hanc benivolentiam rectoris loci et fratrum sibi in alimentum optinere potuerit vel irrumpere conaverit, inprimitus iram Dei omnipotentis incurrat. Actum anno VIII regnante Henrico glorioso rege.