Datierung: [714] 03 02
Ausstellungsort: Bakel
Ego in Dei nomine illuster vir Pippinus dux, filius Ansgisili quondam, et illustris matrona mea Blittrudis, filia Hugoberti, intuitu timoris Dei et animae nostrae remedio cogitantes, ut oratorium ac cellulam in honore Salvatoris et sanctorum Petri et Pauli vel ceterorum apostolorum et reliquiis sanctorum mansionile Suestra, situm in pago Mosariorum super fluviolo Suestra, quod Blittrudis dato precio ab Alberico et Haderico comparavit, a novo fundamine aedificare deberemus. Quod ita et fecimus et ipsum mansionile ad ipsam cellam delegavimus. Placuit nobis ut apostolico patri Willibrordo episcopo ipsam basilicam tradidissemus; quod ita et fecimus in eo modo, ut ibidem fratres peregrinos vel alios Deum timentes congregare debeat. Et illud nobis inserendum placuit, ut cum ipse Willibrordus de hac luce migraverit, ipsi fratres, quem ex se elegerint, sibi constituant abbatem, in ea ratione ut nobis vel filio nostro Grimoaldo et filiis suis vel filiis Drogonis, nepotibus nostris, in omnibus fidelis appareat et ibidem secundum ordinem sanctum degat et sub nostro mundiburdio et ipsius Grimoaldi filiorumque suorum et Drogonis, nepotum nostrorum, defensione persistere debeat. Et si quis Deum timentium, tam de parte nostra quam de reliquis hominibus, de rebus suis eis aliquid condonaverit, Deo propitio eis proficiat in augmentis. Si quis vero, quod minime credimus esse futurum – ut supra. Actum Bagoloso villa publice die secundo Martii. Anno IIII regni domini nostri Dagoberti regis. Et quia nos propter egritudinem in ipsa carta scribere non potuimus, Blittrudem coniugem nostram rogavimus et potestatem dedimus, ut ipsam firmare ad nostram vicem deberet. Quod ita et fecit et qui subscriberent vel signarent, in presenti rogavimus. Blittrudis. Blendumen abbatissa. Helmoinus. Remigius. Chrodoaldus. Geraldus. Adalbertus abbas. Chammingo comes. Crodegertus. Ego Adricharius iussu domini mei Pippini et Plectrude hanc donationem scripsi et subscripsi.