Notitia qualiter venit quidam sacerdos Sancti Martini nomine Tesmunnus, Ambaziacis castri, idibus Augusti, ante presentiam domni Fulconis et filii ipsius... quoque Fulconis, caeterorumque nobilium virorum ibidem residentium, reclamans... alodum suum qui est in villa Avon situs, quem ei avunculus suus Ansebaldus quieto ordine dimiserat, et ipse legitime tenuerat usque illo tempore, quo Normanni eum praedaverunt et in transmarinas partes captum duxerunt, Isembertus malo ordine et contra legem ipsum alodum tenebat. Tunc interrogaverunt eum Domnus Fulco videlicet et praefatus filius ipsius, propter quam causam, ipsum alodum tenebat. Dixerunt etiam praescripti seniores ut ostenderet cartam aut testimonia, quomodo praescriptum alodum comparaverat. Respondit Isembertus quod neque cartam, neque testimonia exinde habebat. Interrogaverunt etiam praefatum Isembertum si talem advocatum habere posset, qui contra advocatum praeliberati Tesmunni in campum hoc approbare auderet, quod praetitulatus alodus plus pertinebat Isemberti per comparationem, quam praefati Tesmunni per paternam atque aliorum parentum hereditatem. Respondit denique Isembertus quod ad statutum placitum advocatum suum ad hoc defendendum praeparatum haberet. Judicaverunt ergo ut utrique advocatos suos ad primum mallum adramirent, qui ita unus contra alterum... potuisset, quod ita et fecerunt. Quando enim ad mallum pervenerunt, praetitulatus Isembertus... habere potuit, qui contra advocatum Tesmunni hoc defendere ausus fuisset, quia omnibus... qui ibi aderant, quod praescriptum alodum injuste et contra legem tenebat. Tunc fecit illi domnus Fulco solidos LX reguadiare propter hoc, quod suum advocatum ad statutum placitum adramivit... habere non potuit. Exnde judicaverunt omnes, qui ibi aderant, quod nullum alium judicium Tesmunnus facere deberet, quam super sanctas reliquias, quia sacerdos erat, propria manu... quod statim fecit. Et praedictus Isembertus se exinde recredidit et per festucam guerpivit. Tunc nec... praefato Tesmunno, ut ex tali diffinitione notitiam quaereret, quam statim fieri jusserant. His praesentibus et videntibus acta fuit.

Signum domni Fulconis. Signum Fulconis filii ipsius. Signum Erardi advocati et legislatoris. Signum Arduini legislatoris. Signum Heldemanni vicarii. Signum Guanilonis vicarii. Signum Bernardi. Signum Marchoardi. Signum Fulculfi. Signum Odulgerii. Signum Rainaldi. Signum Adalelmi.

Data mense Augusto, anno domini incarnationis DCCCCXLI, sive anno IIII regnante Hlodovico rege filio Karoli.