Multipliciter multiplex omnipotentis misericordia dei perplurimum honorare voluit genus humanum, dum cuique mortali largiri dignatus est et ex terrenis rebus coelestia et ex temporalibus ac transitoriis sempiterna possit praemia mercari, ipso domino misericorditer promittente: Date elemosinam et omnia munda fient vobis. Quapropter Ego in dei nomine Ardradus de tanta omnipotentis dei promissione bene securus, tractans modum infirmitatis humanae, pavensque molem mearum nequitiarum et pertimescens utrumque diem judicii, ut eundem omnipotentem dominum factorem et redemptorem, de cujus misericordia nullatenus dubito, piissimum in die meae necessitatis invenire merear, insuperque pretiosissimum confessorem ejus sanctum, cui me totum et anima et corpore committo, et sub cujus protectionis alas de ipsius mercede bene confisus confugio, piissimum intercessorem invenire merear, pro remedio genitoris mei domni Attonis ac etiam genitricis meae, necnon et remissione meorum facinorum offero omnipotenti Deo et sancto confessori ejus Martino, ad usus suorum canonicorum alodum juris mei, villam videlicet Bainam, cum domibus, vineis, silvis, pratis, aquis, mobilibus et immobilibus, et cum hominibus, ac mancipiis utriusque sexus, cum terris cultis et incultis et cum omnibus suis appenditiis, in quibuscunque adjaceant locis, utilitatibus et adjacentiis, de meo jure et dominatione in jus et potestatem Sancti Martini suorumque canonicorum cedo, dono, trado, atque transfundo perpetualiter ad possidendum. Eo siquidem rationis tenore et sub praetextu Sancti Martini ac consensu praedictorum suorum canonicorum frater meus Atto, ipsum alodum sub omni integritate, quandiu advixerit, extra communionem suorum omnium parentum et amicorum teneat et possideat, reddens fratribus in die depositionis meae ob memoriam meam, meorumque omnium parentum et amicorum, argenti libram unam. Quod si ex hac institutione neglegens aut tardus extiterit, id ipsum contra fratres legaliter emendare studeat aut res.... statim amittat. Post suum vero digressum, ad quem sine dubio venturus est, praefatas res omnes potestas sancti Martini ad peculiares usus, ut diximus, fratrum sine alicujus exspectate consignatione aut contradictione revocare studeat, sicut sunt sitae in pago Aurelianense in vicaria habentes licentiam secundum propriam legem faciendi exinde quicquid voluerint. Si autem fuerit aliquis ullo unquam tempore, quod nullatenus fieri posse credo, scilicet ullus de heredibus ac proheredibus meis, seu etiam alia quaelibet aliunde intromissa persona, quae contra hanc devotissimam meam elemosinam, aliquam repetitionem movere temptaverit, in primis iram omnipotentis dei et offensam sancti Martini, nisi citissime resipuerit, incurrat, et insuper contra quibus litem intulerit legali decreto, auri ad purum excocti libras LX coactus exsolvat, et insuper hujus meae contulitionis et elemosinae auctoritas meis ac fratris mei Attonis, aliorumque parentum meorum, sive nobilium virorum manibus corroborata, firma, et inviolabilis ac diuturna ubique permaneat.

Signum Ardradi, qui hujus Elemosinae auctoritatem consentientibus suis parentibus fieri et affirmare rogavit. Signum Attonis fratris sui vicecomitis. Signum Gunberti avunculi ipsorum. Signum Fulconis vicecomitis. Signum Maingaudi nobilis vasalli. Signum Rainaldi vicarii. Signum Ebuli vicarii. Signum Gauzelmi. Signum Gualterii. Signum Abbonis legislatoris.

Data est autem hujus donationis auctoritas III kal. octobris in basilica Beati Martini ad ipsam sepulturam, ubi isdem sepeliebatur Ardradus, anno I regnante domno Karolo rege.

Archanaldus levita gregis beati Martini ac scolae secundicerius rogatus scripsi et subscripsi.