Donum ejusdem comitis, de chalanno salem deferente per Ligerim a Nannetis usque ad Turonum.
Nosse debebitis si qui eritis posteri nostri, Majoris scilicet hujus habitatores Monasterii sancti Martini, comitem Gausfredum, Fulconis Andecavensis comitis filium, perdonasse perpetuo, pro anima sua, sancto Martino et nobis sub domno ahbate Alberto servientibus, per cuncta ditionis suae loca, a Nannetensi videlicet urbe usque ad Turonum, teloneum omne navis nostrae et chalanni unius salem in usus nostros ab illis partibus per Ligerim deferentis; et auctorizasse hoc Adeladem comitissam Teutonicam, uxorem illius, et nepotes ejus Gausfredum comitem, successorem ipsius, et Fulconem fratrem ejus. Hoc autem cum pro cura medicinae quam quidam noster monachus Tetbertus, diutinae infirmitati ejus assidue invigilans, impenderat, ex parte fecisset, plus tamen profectum animae suae in hac perdonatione consideravit. Cujus perdonationis, quae apud Andecavem, quando jam ex hac vita erat exiturus, facta est, isti affuerunt testes: Gauscelinus, Stabilis, Garnerius camerarius ejus, Guarinus cellararius ejus, Robertus praepositus Andecavis, Rainaldus de Castello, Archembaldus filius Ulgerii decani, Tetbaldus de Jarzei, Artaldus Burgundio, Hubertus Ragodius, Rainaldus grammaticus, Bernardus clericus, Gausbertus canonicus Sancti Laudi, Tetbertus monachus medicus.