In nomine sanctae et individuae trinitatis. Ego Angelbaudus, Dei gratia Turonorum dictus archiepiscopus, universis sanctae matris ecclesiae filiis, tam praesentibus quam futuris, sub hujus testificatione cyrographi notificare curavi qualiter concordia inter Bernardum, Nannetensem episcopum, et monachos Majoris Monasterii, super ecclesiis quas praedicti fratres in castellaria Castri Celsi tenere noscuntur, in praesentia nostra hac tandem pacis foederatione sopita quieverit. In praefatis igitur ecclesiis, utpote S. Mariae Magdalenae, S. Petri de Castro Celso, S. Petri de Varenna, S. Salvatoris, S. Mariae de Liriaco et in ecclesia de Faiht, monachi presbiteros eligentes episcopo praesentabunt: ut ab eo, si idonei fuerint, curam animarum suscipiant; obedientiam tanquam episcopo suo ei exhibeant, ad synodum Nannetensem euntes; sacrum chrisma et oleum et coetera parrochialibus officiis necessaria ab eo accipiant; et ex singulis praefatis ecclesiis, excepta capella S. Petri de castello, pro synodali censu XII denarios annuatim reddentes, nullam aliam exactionem episcopo, archidiacono seu decano, nisi sponte voluerint, impendant. In ecclesia vero S. Mariae de Landa, quae communis est inter ipsos monachos et moniales S. Sulpicii, eodem modo quo supradiximus communiter presbiterum eligentes, episcopo praesentent, ut et ipse eandem subjectionem quam et coeteri ei exhibeat et XII denarios annualiter ex synodo reddat. Presbiteri siquidem ipsarum ecclesiarum monachis de redditibus suis fidelitatem faciant; et si de temporalibus eis forisfecerint, in curia prioris sui justitiam eis exequantur; de coeteris autem omnibus de quibus ad episcopum pertinet judicare, tam ipsi presbiteri quam et parrochiani sui episcopo in curia sua reddant. Capellanum vero de Liriaco, quia de mensa rnonachorum est, post quadriennium sive quinquennium, monachis, si voluerint, removere liceat; et substituendum eadem lege quam supradiximus episcopo presentent. In qua nimirum parrochia et in illa de Faiht, in emendationibus illis quae ex adulteriis et sacrilegiis atque hujusmodi episcopo proveniunt, monachi medietatem habebunt. In ecclesia vero de Drugino, si monachi eam adquirere poterunt, concedit episcopus ut monachi, sicut in ecclesia S. Mariae de Castro Celso temporalia, episcopus synodalem censum et coetera episcopalia, habeat. Sed et in ecclesia S. Petri quae est juxta S. Opportunam in Radesio, episcopus monachis XL solidos per annos singulos in perpetuum tribuit: ita tamen quod si eos eis habere non posse contigerit, ipse episcopus vel ejus successor in aliqua ecclesiarum suarum supplebit. Ut igitur haec concordia majorem in posterum obtineat firmitatem, praesens jussimus cyrographum fieri et auctoritatis nostrae sigillo, sed et Nannetensis er Corisopitensis episcoporum necnon et capituli S. Petri Nannetensis et S. Martini Majoris Monasterii corroborari; et eorum nomina qui huic concordiae interfuerunt subtus annotari curavimus: Theoinnus Turonensis archidiaconus, Rotbertus Nannetensis archidiaconus, Radulfus Nannetensis thesaurarius, Morvannus presbiter; ex parte monachorum: Bermundus prior Majoris Monasterii, Haimericus eleemosinarius, Robertus notarius, Bartholomeus prior Nannetensis. Actum Turonis, anno incarnationis dominicae MCLIo, epacta I, concurrente VII; piissimo Ludovico, Ludovici filio, in Francia regnante, domino Eugenio summum pontificatum optinente.