Notum fieri desideramus omnibus tam presentibus quam futuris, qualiter ego Snelhardus, socer Waldfridi, et ego Waldfridus, gener eiusdem Snelhardi, pro remedio animarum nostrarum et pro requie animae Suanburge, filie Snelhardi, uxoris Waldfridi, tradidimus hereditatem nostram in Liudinchuson cum omnibus que ad eandem hereditatem iuste respiciunt, siue in terra, siue in silua, siue in pascuis, siue in pratis, siue in aquarum cursibus et cum omni utilitate ad reliquias sancti saluatoris et sancte Marie semper uirginis et in manus Liudgeri, qui eas secum portat quocumque ierit; hec autem in elemosinam nostram et in elemosinam carissimae nobis supradicte Suaneburge supranominato abbati Liudgero legaliter tradidimus, traditaque in perpetuum esse uolumus et nullis umquam temporibus inmutari, sed ad pepetuos usus ecclesie dei iure hereditario ipse abbas Liudgerus possideat et fructificare faciat in communem elemosinam nostram; quicquid exinde facere uoluerit, in perpetuum liberam et firmissimam a nobis et ab omnibus habeat potestatem.
Acta est autem huius traditionis confirmatio publice in ipso loco Liudinchuson, iuxta fluuium Stibirne, VIII idus decembris, anno XXXIII regni gloriosissimi regis Karoli, coram testibus quorum nomina in testimonium subtus notauimus. Signum Snelhardi qui hanc traditionem perfecit et propria manu firmauit. Signum Waldfridi qui similiter fecit. Signum Bobonis. Signum Helmdagi. Folcbaldi. Gerberni. Marcuuardi. Grimundi. Alfgrimi. Helmrici.