Notum fieri desideramus omnibus tam presentibus quam futuris, qualiter nos coheredes et conparticipes et consanguinei his nominibus: Reginaldus, Folchardus, Gerhardus, UUifil et Helmberhtus, tradidimus agrum hereditarii iuris nostri in UUithmundi1 Liudgero presbitero et abbati, ad construendam in eo eclesiam, in aquilonali latere agri illius, quem a UUrachario comite tradente ipse Liudgerus suscepit; traditumque in perpetuum esse uolumus et nullis umquam temporibus inmutari, sed ad perpetuos usus et ad utilitatem eclesie dei supradictus presbiter liberam et firmissimam a nobis et ab omnibus habeat potestatem, quicquid exinde uiuens agere uoluerit aut cuicumque post obitum suum tradere decreuerit ad colendum et fructificandum in eclesia dei.
Si quis uero, quod futurum esse non credimus, nos ipsi, quod absit, aut aliquis de heredibus uel proheredibus nostris contra hanc traditionem uenire temptauerit aut eam infrangere uoluerit, instigatus a diabulo, inprimitus iram dei celestis incurrat et a sanctorum angelorum sotietate separetur et ab ingressu omnium eclesiarum alienus existat, donec se emendat a presumtione nefanda, et insuper in dominicum auri libras duas, argenti pondus decem coactus exsoluat, et sic quidem, quod repetit, euindicare non ualeat, sed firma et inmotabilis hec traditio in sempiternum permaneat, stipulatione subnixa.
Acta est autem publice in loco ipso qui dicitur UUithmundi, anno tricesimo secundo regni relegiosissimi regis Carli, sub die XVI kalendas octubris. Notaui diem, locum, tempus quo hec scripta sunt. Ego Thiatbaldws humilis presbiter rogatus scripsi et subscripsi. Isti sunt uisores et auditores: Signum Folchardi, Gerhardi, UUifil et Helmberti qui hanc traditionem perfecerunt et propriis manibus firmauerunt.
Signum Hildigeri. Signum Oodhelmi. Signum Meginungi. Signum UUaldfridi. Signum UUerinberti. Signum Hrodberti. Signum Liudgeri. Signum UUerinhardi. Signum Engilberti.