König Ludwig schenkt seinen Antheil an dem Hof und der Kirche Feldkirch an Sanct Gallen.
Datierung: 909 01 07
Ausstellungsort: Bodmann
† In nomine sanctae et individuae trinitatis Hludowicus divina favente clementia rex. Quidquid ad loca sancta impendiorum conferre curaverimus, Deum nobis pro hoc remuneratorem promereri confidimus. Et idcirco omnes fideles nostros, praesentes videlicet et futuros scire volumus, qualiter nos ob amorem Domini nostri iesu Christi et peticionem religiosissimi episcopi et nutritoris nostri Adalperonis cum consultu fidelium nostrorum, Hathonis scilicet et Salomonis venerabilium episcoporum, comitum vero Purchardi, Adalperti et Odalrici, quasdam res proprietatis nostrae ad monasterium sancti Galli iure perpetuo in proprietatem concessimus, hoc est in Retia Curiensi in comitatu Purcharti, in loco Feldkiricha dicto, quicquid nos iuste et legitime in illa curte sive basilica habere videbimur, cum decimatione et terra salica et omnibus iuste et legitime ibidem aspicientibus, aedificiis, mancipiis utriusque sexus, terris, agris, campis, alpibus, pratis, pascuis, silvis atque silvarum marchis, aquis aquarumque decursibus, piscationibus, molinis, exitibus et regressibus omnibusque utensilibus ibidem pertinentibus; eo scilicet tenore, ut eaedem res a presenti die ad monasterium sancti Galli iure perpetuo absque ullius contradictione pertineant et firmissima nostra concessione delegantur atque sub potestatem abbatum sancti Galli firmiter redigantur illorumque dispositione ad servitium eorundem sanctorum pro remedio animae nostrae sive etiam ipsius religiosissimi episcopi Adalperonis iuste et rationabiliter ordinandae. Et ideo hoc nostrae auctoritatis preceptum inde conscribi iussimus, per quod decernimus atque omnino iubemus, ut prefatae res, sicut supra diximus, sub potestate atque dominio rectorum predicti monasterii sancti Galli deinceps firmiter atque inviolabiliter permaneant, nullo umquam successorum nostrorum hoc irrumpente. Et ut hoc nostrae largitionis auctoritas succedentibus temporibus firmiorem atque diuturniorem in Dei nomine obtinere valeat vigorem, manu propria subter eam firmavimus et anuli nostri impressione insigniri iussimus. Signum domni Hludowici M serenissimi regis. Odalfridus notarius ad vicem Piligrimi archicappellani recognovit et subscripsit. Data VIII id. ian., anno incarnationis Domini DCCCCVIIII, indictione XII, anno autem regni domni Hludowici VIIII. Actum Potamico palatio in Dei nomine. Amen.