Amata überträgt den von Linko, ihrem Herrn, erhaltenen Besitz zu Linggenwil an Sanct Gallen.
Datierung: 903 01 13
Ausstellungsort: Reichlingen
In Dei omnipotentis nomine Ego Amata cum manu domini mei Winihardi pro remedio animae prioris mei senioris Linkonis et pro nostrarum remedio animarum parentumque nostrorum talem proprietatem in loco, qui vocatur Linkenwilare, qualem post mortem praedicti prioris mei senioris sua concessione possedi et usque hodie dinoscor habere trado ad monasterium sancti Galli, ubi modo venerabilis Salomon episcopus abbatis regimen visus est habere, cum omnibus eisdem rebus succedentibus, tam domibus, quam caeteris aedificiis, agris, pratis, campis, pascuis, silvis, viis, aquis aquarumque decursibus, cultis et incultis, mobilibus et immobilibus, omnia ex integro ad praefatum monasterium trado, exceptis mancipiis et una hoba; ea ratione, ut has res, quas, dum adhuc praefatus meus dominus Linko viveret, cum mea hereditate concambiavi de eodem monasterio et in possessionem mihi adquisivi quoadusque viverem, econtra in beneficium accipiam et utrasque res ad me recipiens per tempus vitae meae possideam. Similiter et praedictus dominus meus Winihart, si me supervixerit, tempore vitae suae utrasque res possideat redimendi tamen licentia denegata. Si autem ego illum supervixero, quandocumque mihi complaceat cum uno solido ab ecclesia, que in Helfolteswilare structa est, redimendi habeam potestatem. Si autem ego non redimam, post obitum meum praedicta villa ad monasterii hospitalem succedat perpetualiter possidenda; eo pacto, ut in die solemni sancti Martini de eadem villa tam fratribus, quam ceterae familiae ob recordationem prioris senioris mei et nostram pariter singulis annis cum omni abundantia convivium celebretur, reliquae res ad suum redeant locum Si quis autem, quod fieri non credo, hanc traditionem irrumpere temptaverit, iram Dei incurrat et ad aerarium regis auri uncias III, argenti pondera V coactus persolvat traditio firma nihilominus stabilisque permaneat cum stipulatione subnexa Actum in loco nuncupato Richilinga publice, praesentibus istis, quorum hic signacula subponuntur Signum ipsius Amatae et advocati et domini sui Winiharti, qui hanc traditionem patraverunt. Signa et aliorum testium. Salomon episcopus. Adalbret comes. Purchart comes. Reginbold comes. Arolf. Eskirich. Reicho. Wito. Folchrat. Willehere. Hadamar. Engilram. Note. Wolfker. Wolfrid. Horscolf. Lantfrid. Wezo. Hadabret. Ego itaque Elolf indignus subdiaconus et sancti Galli cucullariorum novissimus scripsi et subscripsi Notavi diem id. dec, III fer annum regis Hludowici IIII, comitem Adalbertum.