König Ludwig bestätigt dem Kloster Sanct Gallen alle ihm von seinen Vorgängern ertheilten Privilegien.
Datierung: 903 06 24
Ausstellungsort: Forchheim
† In nomine sanctae et individuae trinitatis Hludowicus divina favente clementia rex. Si fidelium nostrorum petitionibus, quas pro ecclesiarum sibimet commissarum utilitatibus nobis suggesserint, dementer annuimus ac pie prospicimus, id nobis et ad statum regni praesentis et ad futuri praemium feliciter obtinendum liquido profuturum esse confidimus. Quam ob rem noverit generale collegium omnium fidelium nostrorum, praesentium scilicet et futurorum, quia Salomon venerabilis episcopus et abba coenobii sancti Galli, qui in vicem Pernharti abbatis, cui suis culpis exigentibus, quia Pernharto regiae maiestati resistenti et regni alieni invasori favit, abbatia sua ablata est, a regia potestate primo subrogatus est ac deinde omnium fratrum ibidem Domino famulantium communi deliberatione, quia eos divinitus et humanitus bene procurare studuit, secundum regulam sancti Benedicti electus est, in generali placito nostro Foracheim habito per suggestionem fidelium nostrorum primatum videlicet, qui de diversis regni nostri finibus illic collecti affuerunt, quorum nomina haec sunt: Hatho, Walto, Adalpero, Erchanpold, Theotolf, Tuto et Einhart, venerabiles episcopi, comites vero Chuonrat, Kebehart, dux regni, quod a multis Hlotharii dicitur, Purchart, marchio Thuringionum, Adalpreht, Purchart, marchio Curiensis Raetiae, Liutpold, dux Boemanorum, Pabo, Uodalrich, Arnolf, Chuonrat, Hug, Reginpold, Adalgoz, Ruochere, Purchart filius Walahonis, Liutfrid, Cotedanc, Ernust et Erlolf, horum omnium, ut dictum est, fidelium nostrorum et aliorum plurimorum interventu atque consultu praelibatus Salomon, dilectus episcopus noster, petiit clementiam nostram, ut omnia privilegia a bonae memoriae pio genitore nostro, Arnolfo videlicet imperatore augusto sive a caeteris praedecessoribus suis, proavo videlicet illius Hludowico imperatore et filio eius gloriosissimo rege Hludowico necnon patruo eius Karolo imperatore augusto, praedicto coenobio concessa nostrae conscriptionis auctoritate roboraremus. Nos quoque memorati dilecti episcopi nostri et praetitulatorum fidelium nostrorum suggestionibus libenter annuimus iustaeque et rationabili eorum petitioni congratulando paruimus ipsumque coenobium cum fratribus in hoc Domino militantibus sub nostrae immunitatis tuitione suscepimus et quicquid praenotati Franchorum imperatores seu reges ipsi concesserant per omnia et in omnibus hoc scripto confirmavimus, decernentes et statuentes, quatenus nullus iudex publicus vel quaelibet superioris aut inferioris ordinis persona in ecclesiis, villis, locis aut agris ipsius monasterii aut causas audiendas vel freda exigenda aut mansiones sive paratas faciendas exigere praesumat nec homines tam ingenuos, quam et servos, super terram eiusdem coenobii commanentes per vim distringere aut inde fideiussores tollere sive inrationabiliter audeat inquietare. Et quicquid legali inquisitione ad ipsum monasterium inquirendum sit, sub coacto iuramento nobilium virorum in unoquoque comitatu habitantium, in quo huiusmodi inquisitio sit facienda, ita inquiratur, sicut monasterio Sindleozzesauva dicto, ibi in vicino posito, concessum est inquirendum. Et quia praesertim ob privilegium electionis eorundem fratrum a suprascripto praesule et abbate eorum omniumque praescriptorum amicorum eius haec petitio facta est, quamvis universa statuta suprataxata rata ac firma esse velimus et esse rite debeant a potestate divinitus nobis collata firmiter statuimus, ut saepe nominati monasterii fratres ab hodierna die ac deinceps securam teneant potestatem inter se eligendi abbatem, quamdiu inter illos talis inveniri queat, qui proprositum monachicum iuxta regulam sancti Benedicti bene regere et ordinare praevaleat. Et ut huius privilegii praesens pagina in aeternum et ultra firma consistat et ab omnibus fidelibus nostris verius credatur ac diligentius conservetur, manus propriae inscriptione illam firmavimus et sigillo nostro consignari iussimus. Signum domni Hludowici M serenissimi regis. Ernustus cancellarius ad vicem Theotmari archicappellani recognovit et subscripsit. Data VIII kal. iul., anno incarnationis Domini DCCCCIII, indictione VI, anno vero regni domni Hludowici IIII. Actum Foracheim feliciter. Amen.