König Arnolf bestätigt dem Kloster Sanct Gallen die Schenkung der edeln Frau Pirin zu Riete, Uetigen, Biglen(berg), Lyssach, Albineswilare, Perehtoltespuron und Eichi, mit Ausnahme ihres Besitzes zu Gomerkingen und Ratolfingen, und die Schenkung Thiotharts und Puobo's zu Bäriswil und Langenthal.
Datierung: 894 08 26
Ausstellungsort: Regensburg
† In nomine sanctae et individuae trinitatis Arnolfus divina favente clementia rex. Si petitionibus procerum fideliumque nostrorum iuste et rationabiliter postulantium aures serenitatis nostrae accommodamus, devotiores eos et fideliores in nostro servitio efficimus et superni muneris donum ob hoc nobis impertiri liquido credimus. Quapropter omnium fidelium nostrorum, praesentium scilicet et futurorum cognoscat prudentia, qualiter venerabilis episcopus ac dilectus fidelis noster Salomon obtulit obtutibus nostris quandam cartulam, in qua continebatur, qualiter quaedam nobilis matrona nomnie Pirin tradidit ad sanctum Gallum confessorem Christi suum proprium, hoc est in superiori Aragouve in comitatu Hebarhardi in locis nominatis, id est ad Riete et in Utingun et in Pigiluna et in Lihsacho et in Albineswilare et Perehtoltespuron et ad Eichi et ubicumque habuit in prefato pago, nihil extra dimittens, nisi quod habuit in Comirichingun et unam hobam in Ratolingun sitam; insuper alteram nobis ostendit traditionis notitiam, in qua continebatur, qualiter Thiothart tradidit ad iam dictum sanctum Gallum quicquid illi et fratri suo Puboni in partem suam eorum parentes dederunt in locis nominatis, hoc est ad Perolteswilare et in Langatun in superiori pago et comitatu. Tunc etiam idem memoratus episcopus nostram precatus est clementiam, ut iam dicta loca nostrae auctoritatis praecepto ad sanctum Gallum confirmaremus. Nos vero petitionibus eius assensum prebentes statuimus ita fieri, unde hoc presens praeceptum nostrum iussimus conscribi, firmiter statuentes, ut praenominata loca, quae supracripta femina ad iam fatum monasterium tradere videbatur, absque ullius contradictionis obstaculo ab hodierna die et deinceps perpetualiter persistant. Et ut hoc firmius habeatur veriusque credatur ac diligentius a cunctis fidelibus nostris observetur, manu propria nostra subtus id roboravimus et inpressione anuli nostri iussimus insigniri. Signum domni Arnolfi invictissimi regis. Wihhingus archicancellarius ad vicem Theotmari archicappellani recognovi et subscripsi. Data VII kal. sept., anno incarnationis Domini DCCCXCIIII, anno VII regni Arnolfi largissimi regis. Actum Reganespurc in Dei nomine feliciter. Amen.