König Arnolf bestätigt dem Kloster Sanct Gallen die Immunität und das Recht der freien Abtswahl.
Datierung: 892 07 02
Ausstellungsort: Ranshofen
† Ordinante sancta et individua trinitate Arnolfus rex, ecclesiae catholicae filius et defensor. Cum dispositione superna in regnum patrum nostrorum, regum videlicet atque imperatorum sublimati fuissemus, placuit nobis, ut omnibus regni nostri provinciis, immo singulis ordinibus et hominibus maximeque episcopiis atque monasteriis, leges, scita, canones atque regulas ab antiquis sibi traditas non solum observare concederemus, sed etiam ad observandum nostra illos auctoritate iuvaremus. Sed accidit, ut pro quorundam hominum negligentia et incautela de quodam loco a prioribus nostris inter primos habito, hoc est monasterio sancti Galli, serenitas nostra adeo turbaretur, quatenus abbatem ipsum honore sibi a nobis inpenso privaremus et fidelem capellanum nostrum Salomonem in eius locum subrogaremus. Qui cum illuc pervenisset ac devote a fratribus susceptus fuisset devotiusque ipse cum illis conversatus fuisset, cognita eorum humilitate et obaedientia atque nobis fide- litate necnon pro nobis ac regno nostro orationum instantia, propter communem etiam ipsorum utilitatem abbas ab eisdem fratribus electus, idem cum sociis suis apud excellentiam nostram imploravit et impetrando obtinuit, ut deinceps eidem loco tale Privilegium permitteremus, statueremus atque roboraremus, quale a proavo nostro Chludowico imperatore et filio eius gloriosissimo rege Chludowico et patruo nostro Karolo imperatore concessum est, patre nostro Karlomanno semper in bellorum procinctu, videlicet ut potestatem habeant inter se abbatem eligendi, qui et illos ad divinum servitium distringendi vigorem et ad nostrum obsequium perficiendi strenuitatem habeat, et ut locus ipse sub tuitionis nostrae immunitate consistat, et ut nullus iudex puplicus aut quilibet superioris aut inferioris ordinis rei publicae procurator in ecclesias aut loca, villas vel agros seu reliquas possessiones memorati monasterii, quas moderno tempore infra regnum divinitus nobis collatum iuste et rationabiliter possidet vel quae deinceps divina pietas ibidem augere voluerit ad causas iudiciario more audiendas vel freda exigenda aut mansiones vel paratas faciendas aut fideiussores tollendos aut homines ipsius monasterii super terram eius commanentes inrationabiliter distringendos nec ullas redibitiones requirendas nostris et futuris temporibus ingredi audeat vel penitus exigere presumat; sed liceat ipsi abbati suisque successoribus res predicti monasterii cum omnibus sibi subiectis sub tuitionis atque immunitatis nostrae defensione quieto ordine possidere et nostro fideliter parere imperio, et quandocumque ipse abba vel successores eius obierint, quamdiu ipsi monachi inter se tales invenire potuerint, qui ipsam congregationem regulariter regere valeant, per hanc nostram auctoritatem atque consensum licentiam habeant eligendi abbatem, quatinus monachi ibidem Deo famulantes pro nobis et stabilitate regni nostri Domini misericordiam iugiter exorare debeant. Haec vero auctoritas ut per diuturna tempora inviolabilem obtineat firmitatem manu propria nostra subter eam firmavimus et anuli nostri inpressione insigniri iussimus. Signum domni Arnulfi M invictissimi regis. Engilpero notarius ad vicem Theotmari archicappellani recognovi et subscripsi. Data VI non. iul., anno dominice incarnationis DCCCXCII, indictione X, anno piissimi regis Arnulfi V. Actum ad curtem regiam, quae Rantesdorf nominatur in Dei nomine feliciter. Amen.