König Arnolf schenkt seinem Getreuen Anno eine von ihm bis jetzt als Lehen innegehabte Kirche mit sieben Hufen zu Augst.
Datierung: 891 01 06
Ausstellungsort: Regensburg
† In nomine sanctae et individuae trinitatis Arnolfus divina favente clementia rex. Notum esse volumus omnibus sanctae Dei ecclesiae fidelibus nostrisque, praesentibus et futuris, qualiter nos rogatu et deprecatione Adalperti et Theotingi fidelium nostrorum cuidam fideli nostro nomine Anno quasdam res proprietatis nostrae in proprium concessimus, hoc est in pago Aragouve in comitatu Chadalohi senioris sui in villa Augusta, quicquid hactenus habuit in beneficium, totum ei concessimus in proprium, id est aecclesiam I et hobas VII cum aedificiis et curtilibus mancipiisque omnibus utriusque sexus, cum censibus, terris, agris, campis, cultis vel incultis, pratis, pascuis, silvis, aquis aquarumque decursibus, molinis, piscationibus, viis et inviis, exitibus et regressibus, mobilibus vel inmobilibus, quaesitis et inquirendis et cum omnibus iuste et legitime ad ipsam aecclesiam et illas VII hobas pertinentibus, totum memorato Annoni per hoc praesens auctoritatis nostrae praeceptum in proprium donamus et tradimus, ut ab hodierna die de his omnibus securam et firmissimam habeat potestatem tenendi, donandi, vendendi, commutandi et quicquid sibi placuerit faciendi; ea videlicet ratione, ut Dei aecclesiae et episcopo de sua iustitia nihil inde minuatur aut subtrahatur. Et ut haec nostra largitio firmior habeatur et diligentius conservetur, manu propria nostra sub hoc confirmavimus et sigillo nostro assignari iussimus. Signum domni Arnolfi M serenissimi regis. Aspertus cancellarius ad vicem Deotmari archicappellani recognovi et subscripsi. Data VIII idus ian., anno Domini DCCCXCI, indictione VIII, anno autem IIII regni domni Arnolfi serenissimi regis. Actum Reganesburch in Christi nomine feliciter. Amen.