Kaiser Karl überträgt dem Presbyter Ruotbert, seinem Ministerialen, die Kirche Klengen auf Lebenszeit.
Datierung: 881 05 09
Ausstellungsort: Pavia
† In nomine sanctae et individuae trinitatis Karolus divina favente gratia imperator augustus. Si de rebus terrenis, quas divina sumus largitate consequnti, fidelibus nostris adiutorium prebere studuerimus, non solum imperialem morem decenter implemus, verum etiam eos procul dubio fideliores ac devotiores in nostro efficimus servitio et ad aeternam vitam feliciter obtinendam profuturum liquido credimus. Quapropter comperiat omnium fidelium nostrorum, praesentium scilicet et futurorum sollertia, qualiter carissima coniunx nostra Riggarda necnon Liutuhardus venerabilis episcopus ac dilectus archicancellarius noster deprecati sunt celsitudinem nostram, ut ob mercedis nostrae augmentum quasdam res proprietatis nostrae consistentes in Alamannia in comitatu Nidinga, in pago Berehtoldesbara, in villa Chieninga, id est ipsam ecclesiam, quam antea in beneficium habuit, dilecto ministeriali nostro Ruotberto presbitero diebus vitae suae secure ad possidendum per nostrae auctoritatis praeceptum concessissemus. Quorum petitioni ob amorem domini nostri iesu Christi, memores etiam servitii ipsius, libenti animo assensum praebentes decrevimus ita fieri. Concessimus itaque praefato Ruotberto presbitero ac dilecto ministeriali nostro praefatam ecclesiam ad Chieningam, quam antea in beneficium habuit, hoc quod ibi habuimus, diebus vitae suae secure ad habendum cum omnibus ibidem adiacentiis vel pertinentiis, in decimis, in mancipiis, terris, pratis, pascuis, silvis, aquis aquarumve decursibus, exitibus et regressibus, mobilibus et immobilibus, totum et ad integrum; ea videlicet ratione, ut diebus vitae suae secure in proprium per hoc nostrae auctoritatis praeceptum plenius in Dei nomine confirmatum nullo inquietante, sed Deo auxiliante habeat, teneat atque possideat, post suum vero obitum ad regiam revertatur potestatem. Et ut haec auctoritas largitionis nostrae firmior habeatur et per futura tempora diebus vitae suae a fidelibus nostris verius credatur et diligentius observetur, manu propria nostra subter eam firmavimus et anuli nostri inpressione assignari iussimus. Signum M domni Karoli serenissimi imperatoris. Hebarhardus ad vicem Liutuhardi archicancellarii recognovi et subscripsi. Si quis autem ausu temerario hoc iniuste violare praesumpserit, hunc volumus multandum esse duo milia mancosorum, mille ad cameram nostram et mille ei, cui vim intulit. Data VII idus maias, anno ab incarnatione Domini octingentesimo LXXXI, imperii vero domni Karoli I, indictione quartadecima. Actum Papiae civitate regia in Dei nomine feliciter. Amen.