König Ludwig nimmt das Kloster Sanct Gallen unter seinen Schutz und bestätigt ihm die Immunität.
Datierung: 873 03 01
Ausstellungsort: Frankfurt
† In nomine sanctae et individuae trinitatis Hludowicus divina favente gratia rex. Si erga loca divinis cultibus mancipata tuitionem regalem impendimus et petitiones servorum Dei, quas nobis pro necessitatibus suis innotuerint, ad effectum perducimus, sine dubio ad aeternae beatitudinis praemia capessenda talia facta nobis proficere non diffidimus. Idcirco comperiat omnium fidelium nostrorum, praesentium scilicet et futurorum industria, qualiter venerabilis abba noster Hartmuot deprecatus est celsitudinem nostram, ut ob mercedis nostrae augmentum monasterium sancti Galli cum omnibus ibidem adiacentiis vel pertinentibus sub nostrae immunitatis tuitione et defensionis auctoritate susciperemus. Cuius petitioni ob amorem domini nostri iesu Christi libenti animo assensum praebentes decrevimus ita fieri et iussimus ei fieri hoc nostrae auctoritatis praeceptum, per quod decernimus atque iubemus, ut quicquid adquirendum est ad praefatum monasterium sancti Galli, eo tenore et ordine adquiratur et teneatur, quo etiam in monasterio Augiae habent ac tenent. Et nullus iudex publicus nec quislibet ex iudiciaria potestate nec aliquis ex fidelibus nostris in ecclesias aut domus aut loca vel agros seu reliquas possessiones praedictae ecclesiae, quas moderno tempore iuste et rationabiliter in quibuslibet pagis et territoriis infra ditionem regni nostri habere ac possidere noscuntur quicquid etiam deinceps in iure ipsius sancti loci voluerit divina pietas augeri, ad causas audiendas vel freda exigenda aut mansiones vel paratas faciendas aut fideiussores tollendos aut homines ipsius ecclesiae tam ingenuos quamque et servos iniuste distringendos nec ullas redibitiones aut inlicitas occasiones requirendas ullo umquam tempore ingredi audeat aut exactare praesumat; sed liceat memorato abbati suisque successoribus res praedicti monasterii sancti Galli per hanc nostrae emunitatis tuitionem quieto tramite possidere, ut eis pro nostra ac coniugis carissimaque prole salute Domini clementiam delectabilius exorare delectet. Et ut haec auctoritas firmior habeatur et per futura tempora a fidelibus nostris verius credatur et diligentius observetur, manu propria nostra subter eam firmavimus et anuli nostri inpressione assignari iussimus. Signum M domni Hludowici serenissimi regis. Hebarhardus cancellarius ad vicem Liutperti archicappellani recognovi et subscripsi. Data kal. februarias anno XXXVI regni domni Hludowici serenissimi regis in orientali Francia regnante, indictione VI. Actum Franconofurt palatio regio in Dei nomine feliciter. Amen.