Les moines de Stavelot consultent l’abbé Wibald au sujet des fournages de Stavelot légués au monastère par Odile, femme du maïeur Anselme.
Datierung: [1148, octobre ?]
Reverendo in Christo patri et domino Wibaldo Stabulensis aecclesiae venerabili abbati, humilis ejusdem aecclesiae congregatio fidelem dilectionem et debitam per omnia subjectionem.
Memores, pater amantissime, piae benignitatis vestrae, qua assidue jocundamur, et pre oculis cottidie habentes paternae sollicitudinis vestrae certos fructus et semper valitura monimenta, quod solum possumus, calicem salutis accipiendo et nomen Domini invocando, pro vestra incolumitate vestrisque successibus jugiter Dei misericordiam supplices exoramus. Inde est, quod paternitatis vestrae presentiam continue desideramus; inde est, quod absentem semper diligimus et veneramur, timemus et amplectimur. Salutantes itaque etiam nunc unanimiter dulcedinis vestrae ubertatem, ad unicum protectionis vestrae refugium confugimus, significantes vobis, quod dilecta nobis [Odilia] conjunx quondam Anselmi villici in articulo mortis constituta, ceteris rebus suis ordinatis, fornagia, que ex vestro beneficio in villa nostra Stabulaus tenebat, in manibus aecclesiae pro remedio anime suae et salute pie memoriae Anselmi villici contulit, ita videlicet, ut si vestris patrociniis fulti donatione sua frui possemus, rata quidem haberetur; sin autem, pro X libris denariorum in pignore constitutum suum teneremus. Nos itaque, dum adhuc eadem vivit matrona, consilii vestri solitam clementiam super hoc pie invocamus, genibusque vestris humiliter provoluti intime petimus, ut vestris adjutoriis et defensionibus non fraudetur aecclesia a desiderio, quod tanto tempore desideraverat. Nam soror ejusdem Odiliae Margarita et vir ejus Anselmus atque villicus Malmundariensis multis minis ad hoc, ut donationem vice vestra susceptam reiciamus nos deterrere conantur; modo filio Walteri de Rulant idem beneficium se daturos promittentes, modo a domno Lamberto villico vestro de Baldov X libras denariorum pro ipso beneficio se accepturos minitantes. Super his itaque omnibus consilii vestri oportunitatem per dignationis vestrae rescripta imploramus, quibus si fruimur, minas occursantium nobis parvipendimus. Ceterum si huc usque in aliquibus defectibus constituti fuimus, deinceps per Dei misericordiam meliora speramus. Paternitatem vestram semper nobis utilem Deus et incolumem custodiat.