Datierung: 1031 08 25
Ausstellungsort: Peterlingen
In nomine sanctae et individuae trinitatis. Rodulfus divina favente gratia rex. Occasum mundi huius labentis cernentes finem universae carnis cum tremore prestolamur et ideo ad consulendum animae nostrae et placandum eum, quem in multis nos offendisse cognoscimus, monasterium Viennae situm in honore sancti Andreae puellare dedicatum ob multitudinem puellarum sanctarum olim inibi domino famulantium sic antiquitus et adhuc ita nominatum, quondam celebre, nunc autem ruinosum et ab hominibus quidem neglectum, deo autem, ut credimus, carum restaurare volumus et ad stipendia sanctimonialium, quas illuc mittere desideramus, de nostris propriis rebus honoratum locupletare curamus. Damus igitur ad monasterium sancti Andreae puellare et ad stipendia sanctimonialium ibi famulantium tam pro animae nostrae remedio quam patris nostri ceterorumque parentum nostrorum et ad petitiones Irmingardae reginae coniugis nostrae et ammonitionem et consilium Malleni episcopi et venerandi patris nostri domni Odelonis terram de Gemmas terminatam ab oriente et meridie terra sancti Andreae, de alio fronte aqua Seusi volvente, ab occidente terra de Arco quae est Relii, similiter et terram de Remusiaco de tribus partibus terra sancti Petri terminatam, de quarto fronte terra Vidriali. Damus et terram de Monte Reont, ab oriente terra sancti Petri, a meridie terra Vidriali et terra Bornonis et via publica et terra quae dicitur ad duos rivos et terra ad Obrusa; ab oriente est terra sancti Mauricii, a meridie aqua volvente, ab occidente via publica, in ipsa aqua molendinos tres et vineam super ipsos molendinos. Damus et in civitate Vienna mansiones duas quae sunt Albrici, et vineam unam iunctam ad mansionem; ipsa vinea terminatur duabus partibus via publica, a meridie terra sancti Mauricii, ab occidente terra regali. Damus et iuxta palatium mansionem unam cum vinea simul tenente; terminatur ipsa terra ab oriente terra regali, a meridie terra sancti Mauricii, ab occidente terra Gerlhini. Damus et in Gartiano mansum unum; terminum habet ab oriente terram Vidrialem, a meridie terram Ganoni et Roberti, ab alia parte terram sancti Mauricii. Damus et Arche villam cum omnibus appenditiis suis, sic et villam de sancto Romano cum ecclesia infra sita et constructa. Damus et capellam in honore sancti Albani dedicatam cum vinea subtus iacente. Damus et Satorum villam cum pertinentiis suis et Lamart cum appenditiis suis. Haec, sicut proprie nominata sunt, damus domino et reddimus ad monasterium sancti Andreae quod dicitur puellare et ad usus ancillarum domini ibi domino famulantium. Volumus igitur et hoc precepto regiae auctoritatis sancimus, ut hoc monasterium sit liberum ab omni censu, ab omni exactione iudiciariae potestatis secularia servitia secundum debitum exigentis, solum in tuitione et defensione Viennensis archiepiscopi permaneat ad tuendum et defendendum secundum censuram et regulam sibi competentis examinationis. Ut haec a nobis facta credantur et a posteris nostris non infringantur, manu nostra roboravimus et sigillari iussimus.
Signum domni Rodolfi (M.) regis pii.
Paldolfus cancellarius recognovi.
Data VIIII kal. septemb., luna III, anno ab incarnatione domini MXXXI, regnante domno Ruodolfo reges anno XXXV; actum Paterniaci.