Datierung: 1013 06 18
Ausstellungsort: Murten
In nomine sanctae et individuae trinitatis. Rodulfus divina clementia serenus rex. Sanctas dei ecclesias, quas devota praecedentium nos regum seu venerandorum patrum religio construxit, si aliquibus incrementis augmentamus, spiritaliter et corporaliter nobis proficere non dubitamus. Quapropter notum esse volumus omnibus dei ecclesiae et nostris fidelibus natis et nascituris, qualiter ob animae nostrae remedium nec non petitiones Irmingardis reginae coniugis nostrae dilectae et propter servitia Burchardi Viennensis archiepiscopi damus deo et sancto Mauricio ad serviendum ad episcopatum Viennensem in stipendia fratrum ibidem deo famulantium cortem nostram Communiacum in comitatu Viennense sitam cum ecclesia superstante, cum servis et ancillis et omnibus pertinentiis seu usuariis, ut perpetualiter ibi permaneat in communi eorum dispositione et fraterna utilitate, absque contradictione et inquietudine alicuius exactoriae personae. Ut haec a nobis facta credantur et a posteris nostris non infrangantur, manu nostra roboravimus et sigillari iussimus.
Signum domni Rodulfi (M.) regis.
Paldolfus w cancellarius recognovi.
Data XIIII kal. iulii, luna VII, anno ab incarnatione domini MXIII, regnante domno Rodulfo rege XX; actum Murati.