In nomine sanctae et individuae trinitatis. Rodulfus divina clementia pius rex. Honorificos precedentium nos regum mores et usus regno nostro regnique incolis competentes diligenti cura et vigilanti studio exequi iustum et utile ducimus. Quapropter notum sit omnibus natis et nascendis, qualiter petente Irmingarda regina coniuge nostra carissima et Burchardo Lugdunensi archiepiscopo fratre nostro dilecto nec non Burchardo Viennensi archiepiscopo quandam villam Lusiniacum nomine in comitatu Viennense sitam, quam pater noster aeternae memoriae commendandus Chuonradus rex pro anima matris nostrae Mathildae ad sanctum Mauricium Viennensibus in locis contulit et altare sancti Iacobi attitulavit, nos praeceptali auctoritate ad eumdem locum eodem modo quo pater noster perpetualiter tenendum donamus cum ecclesia supra posita in honore sanctae Mariae constructa et vineis pratis campis silvis et omnibus appenditiis et utilitatibus et usuariis. Volumus ergo et sub divina contestatione sancimus, ut res praedictas nemo praesumptuose invadat, nemo fiscali servitio constringat, sed in dei et sancti Mauricii sanctique Iacobi tuitione quiescant et in presentis archiepiscopi Burchardi amministratione et dominio et eius, quemcumque ei deus subrogaverit, tutela permaneant; alienandi tamen ab ecclesia Viennensi nullam habeant potestatem. Ut haec a nobis facta credantur et a posteris nostris non infrangantur, manu nostra roboravimus et sigillari iussimus.
Signum domni Rodulfi regis (M.) nobilissimi.
Paldolfus cancellarius recognovi.
Data V kal. augusti, luna XXVII anno incarnationis domini MXI, regnante domno Rodulfo reger anno XVIIII; actum Vrbe.