Datierung: 1138 04 11
Ausstellungsort: Lateran
Innocentius episcopus seruus seruorum Dei. Dilecto filio Thomae priori sanctae Mariae de Lochis castro eiusque fratribus tam presentibus quam futuris in perpetuum. Sicut iniusta poscentibus nullus est tribuendus effectus, ita legitima petitio desiderantium non est differenda et quidem, si religiosorum preces benignis auribus exaudimus, nostris procul dubio oportunitatibus clementem dominum reperimus. Huius rei gratia, dilecte in domino fili Thoma, tam tuis quam fratrum tuorum petitionibus clementer annuimus et ecclesiam beatae Mariae de Lochas, in qua omnipotenti Deo deseruitis, quam utique Gaufridus bonae memoriae illustris Andegauorum comes de propriis rebus construxit pariter et ditauit et beato Petro apostolorum principi obtulit, ad exemplum predecessoris nostri sanctae recordationis Iohannis papae XIIi sub eiusdem apostolorum principis tutela et protectione suscipimus et presentis scripti robore communimus. Statuentes, ut quascumque possessiones, quecumque bona idem locus in presenciarum iuste et canonice possidet aut in futurum concessione pontificum, liberalitate regum uel principum, oblacione fidelium seu aliis iustis modis Deo propicio adipisci poterit, firma uobis uestrisque successoribus et illibata permaneant. Obeunte uero te, dilecte fili Thoma, eiusdem loci priore uel tuorum quolibet successorum nullus ibi qualibet surreptionis astutia seu uiolentia preponatur, nisi quem fratres communi consensu uel fratrum pars sanioris consilii secundum Dei timorem sibi sane elegerint. Prohibemus etiam, ut nulli archiepiscopo licentia pateat aliquam dominacionem in eadem ecclesia exercere siue illam interdicere neque super clericos uim aliquam inferre, quin potius ita sit ab omnium hominum dominacione immunis et libera, ut preter Romanum pontificem nullum alium presulem habeat. Statuimus etiam, ut pro amore sanctae Romanae ecclesiae comes Andegauorum aduersus omnes homines sit adiutor et defensor loci illius. Ad indicium autem perceptae huius a Romana ecclesia libertatis quinque solidos Pictauensis monetae, sicut constitutum esse cognoscitur, nobis nostrisque successoribus singulis annis persoluetis. Decernimus ergo, ut nulli omnino hominum liceat prefatam ecclesiam super hac constitutione temere perturbare aut eius possessiones auferre uel ablatas retinere, minuere seu aliquibus uexationibus fatigare, sed omnia integra conseruentur eorum, pro quorum gubernatione et sustentatione concessa sunt, usibus omnimodis profutura. Si qua uero in posterum ecclesiastica secularisue persona huius nostrae constitutionis paginam sciens contra eam temere uenire tentauerit, secundo tertioue commonita, si satisfactione congrua non emendauerit, potestatis honorisque sui periculum patiatur reamque se diuino iudicio existere de perpetrata iniquitate cognoscat et a sacratissimo corpore et sanguine domini nostri Iesu Christi aliena fiat atque in extremo examine districtae ultioni subiaceat. Cunctis autem eidem loco sua iura seruantibus sit pax domini nostri Iesu Christi, quatinus et hic fructum bonae actionis percipiant et apud districtum iudicem premia eternae pacis inueniant. Amen.
Dat. Laterani per manum Aimerici sancte Romane ecclesie diaconi cardinalis et cancellarii III idus aprilis, indictione I, anno incarnationis dominicae Mo. Co. XXXo. VIIIo, pontificatus uero domini Innocentii papae secundi anno nono.