Datierung: 1186 12 28
Ausstellungsort: Verona
Urbanus episcopus seruus seruorum Dei. Dilectis filiis Mainerio abbati monasterii sancti Florent(ii) Salmuren(sis) eiusque fratribus tam presentibus quam futuris regularem uitam professis in perpetuum. Quotiens a nobis petitur, quod religioni et honestati conuenire dignoscitur, animo nos decet libenti concedere et petentium desideriis congruum suffragium impertiri. Eapropter, dilecti in domino filii, uestris iustis postulationibus clementer annuimus et monasterium sancti Florentii de Monte Glonna, quod sub potestate et dispositione Salmuren(sis) monasterii esse dignoscitur, sub beati Petri et nostra protectione suscipimus et presentis scripti priuilegio communimus. In primis siquidem statuentes, ut ordo monasticus, qui secundum Deum et beati Benedicti regulam in eodem loco noscitur institutus, perpetuis ibidem temporibus inuiolabiliter conseruetur. Preterea quascumque possessiones, quecumque bona idem monasterium in presentiarum iuste et canonice possidet aut in futurum concessione pontificum, largitione regum uel principum, oblatione fidelium seu aliis iustis modis prestante domino poterit adipisci, firma uobis uestrisque successoribus et illibata permaneant. In quibus hec propriis duximus exprimenda uocabidis: ecclesiam sancti Petri cum capella sancti Florentii de Maiet, ecclesiam sancte Marie de Marieleis cum capellis sancti Iohannis et sancti Nicholai, ecclesiam sancti Laurentii de Moteio cum capella sancti Iacobi de Beausse, ecclesiam sancte Marie de Masnilio, ecclesiam sancti Albini de Castro Penne, ecclesiam sancti Germani, ecclesiam sancti Egidii de Borno, ecclesiam sancte Marie Magdalene de Botetuscheria, ecclesiam sancti Simphoriani de Busseria cum capella sancte Marie, ecclesiam sancti Christophori de Capella, ecclesiam sancti Petri de Buziliaco cum capella de Pieria, ecclesiam sancti Macharii cum capellis sancte Marie et sancte Margarite, ecclesiam sancti Philiberti, sicut eas cum dignitate et immunitate sua, presentatione quoque et institutione personarum a iurisdictione quoque episcopali utroque iure exemptarum canonice hactenus et pacifice possedistis et nunc sine controuersia possidetis, uobis et per uos monasterio uestro auctoritate apostolica confirmamus. Statuentes, ut nulli liceat in monachos uel clericos predictarum ecclesiarum rationabiliter exemptarum nisi de speciali mandato nostro uel legati nostri excommunicationis uel interdicti sententiam promulgare uel in eos exactiones nouas et indebitas exercere seu circa statum ecclesiarum ipsarum aliquid enormiter immutare contra id, quod ab antiquo usque nunc sine interruptione legitima noscitur obseruatum. Crisma uero et oleum persone predictarum ecclesiarum a uestro monasterio recipiant. Liceat quoque uobis iuxta morem antiquum cui malueritis episcopo uestros presentare clericos ordinandos uel aliquem ad monasterium uestrum uocare, qui ibi uelit ordines eclebrare, sicut hec omnia usque ad hoc tempus sine interruptione legitima obseruata noscuntur. Prohibemus insuper, ne aliquis archiepiscopus uel episcopus contra canonicam et antiquam consuetudinem ad ecclesias predictas accedat causa quidlibet circa statum ipsarum mutandi uel aliquid ordinandi, nisi ab abbate uocatus fuerit uel a sede apostolica destinatus. Decernimus ergo etc., salua nimirum sedis apostolice auctoritate. Ad indicium autem huius libertatis nobis et successoribus nostris nomine predicti monasterii tres aureos singulis annis persoluetis. Si qua igitur etc. Cunctis autem etc. Amen.
R. Ego Vrbanus catholicae ecclesiae episcopus ss.
Ego Henricus Albanensis episcopus ss.
Ego Petrus de Bono presb. card. tit. sanctae Susannae ss.
Ego Laborans presb. card. sanctae Mariae trans Tiberim tit. Calixti ss.
Ego Pandulfus presb. card. tit. basilice duodecim apostolorum ss.
Ego Melior presb. card. sanctorum Iohannis et Pauli tit. Pamachi ss.
Ego Adelardus presb. card. tit. sancti Marcelli ss.
Ego Iacinthus diac. card. sanctae Mariae in Cosmidin ss.
Ego Bobo diac. card. sancti Angeli ss.
Ego Soffredus diac. card. sanctae Mariae in via lata ss.
Ego Rollandus sanctae Mariae in porticu diac. card. ss.
Ego Petrus sancti Nicolai in carcere Tulliano diac. card.
Ego Rad(ulfus) sancti Georgii ad uelum aureum diac. card. ss
Dat. Veron. per manum Alberti sanctae Romanae ecclesiae presbiteri cardinalis et cancellarii quinto kal. ianuarii, indictione quinta incarnationis dominicae anno millesimo centesimo octogesimo sexton, pontificatus uero domini Vrbani papae tertii anno secundo.