Datierung: 1184 10 15
Ausstellungsort: Verona
Lucius episcopus seruus seruorum Dei. Dilectis filiis abbati et fratribus Maioris Monasterii salutem et apostolicam benedictionem. Cum ecclesia uestra ad ius et magisterium Romane ecclesie nullo mediante pertineat et uos a iugo sitis cuiuslibet alterius iurisdictionis exempti, ita ut in ecclesiam uel in personas uestras nemini liceat absque auctoritate Romani pontificis excommunicacionis uel interdicti sentenciam promulgare, quidam, sicut accepimus, ut priuilegium uobis induite libertatis imminuant, sentenciam, quam in uos proferre non possunt, in famulos uestros nulla eorum precedente culpa promulgant uolentes ingenio calliditatis huius efficere, ut sentencie iaculum, quod in uos principaliter et directo non iaciunt, possent in lesionem uestram per personas saltem interpositas retorquere. Unde eorum astucie zelo rectitudinis occurentes presencium uobis auctoritate concedimus et firmiter in posterum obseruari censemus, ne quis in famulos uestros, qui se domui uestre reddiderunt, pro culpa uestra, cuius participes ipsi non fuerint, excommunicacionis sentenciam ferre presumat. Si quis autem aliter presumpserit agere, sentenciam, que ab eo contra presens lata fuerit institutum, uires aliquas decernimus non habere. Dat. Ueron. id. octobr.