Datierung: 1183 05 25
Ausstellungsort: Velletri
Lucius episcopus seruus seruorum Dei. Dilectis filiis canonicis ecclesiae b(eatae) Mariae de Castello Lavallis tam praesentibus quam futuris canonice substituendis in perpetuum. Effectum iusta postulantibus indulgere et uigor postulat aequitatis et ordo exigit rationis, praesertim quando petentium uoluntatem et pietas adiuuat et ueritas non relinquit. Eapropter, dilecti in domino filii, uestris iustis postulationibus clementer annuimus et praefatam ecclesiam, in qua diuino estis obsequio mancipati, sub beati Petri et nostra protectione suscipimus et praesentis scripti priuilegio communimus. Statuentes, ut quascumque possessiones, quaecumque bona eadem ecclesia in praesentiarum iuste et canonice possidet aut in futurum concessione pontificum, largitione regum uel principum, oblatione fidelium seu aliis iustis modis praestante domino poterit adipisci, firma uobis uestrisque successoribus et illibata permaneant. In quibus haec propriis duximus exprimenda uocabulis: tres arpennos uineae, centum solidos Cenomanenses in molendinis Guidonis de Valle fullonariis subtus Pontem Meduanae sitis etc., donationem regiminis scholarum Lavallis. In parrochialibus autem ecclesiis, quas habetis, liceat uobis clericos aut sacerdotes eligere et diaecesano episcopo praesentare, quibus, si idonei fuerint, curam animarum committat, ut ei de spiritualibus, uobis uero de temporalibus debeant respondere. [Decernimus ergo etc. Si qua igitur etc.] Cunctis autem etc. Amen. Dat. Velletri per manum Alberti sanctae Romanae ecclesiae praesbyteri cardinalis et cancellarii octavo kal. iunii, indictione I, incarnationis dominice anno M. C. LXXX. III, pontificatus uero domni Lucii papae III anno secundo.