Datierung: 1173 07 04
Ausstellungsort: Anagni
Alexander episcopus seruus seruorum Dei. Dilectis filiis B. decano et capitulo beati Martini Turonensis salutem et apostolicam benedictionem. Cum inter uos et dilectum filium nostrum nobilem uirum comitem Stephanum super tallia, quam in hominibus apud Liriacum manentibus et in balia Garnerii Archari et in balia Teobaldi Timeri sibi uendicabat, et super aduenticiis, qui albani dicuntur, grauis et difficilis questio uerteretur, tandem mediante uenerabili fratre nostro W. Senouensi archiepiscopo, apostolice sedis legato inter uos et eundem comitem talis compositio intercessit, quod idem comes Ierosolymam proficiscens talliam, quam in hominibus beati Martini Liriaci manentibus et in duabus predictis baliis extra Liriacum iniuste habuerat, uobis et ecclesiae uestre in perpetuum liberam et quietam dimisit. Sane cum idem comes causam de aduenticiis, qui albani dicuntur, in manu predicti archiepiscopi dimisisset, archiepiscopus rei ueritate ab antiquis hominibus eiusdem comitis per sacramentum inquisita plenius et cognita ita inter uos statuit, quod, si infra annum et diem aduentus sui non fecerint dominum ecclesiam uestram uel alium, dominio comitis subiacebunt nec tamen comes in eis sicut nec in hominibus ecclesie uestre talliam aliquam exercebit. Quia uero nostrum est approbare et apostolici scripti robore communire, que inter aliquos amicabili sunt pactione sopita, prescriptam compositionem, sicut in autentico scripto eiusdem archiepiscopi exinde facto continetur, uobis et ecclesie uestre auctoritate apostolica confirmamus et presentis scripti patrocinio communimus. Statuentes, ut nulli omnino hominum etc. Si quis autem etc. Dat. Anagniae IIII non. iulii.