Datierung: 1156 03 20
Ausstellungsort: Benevent
Adrianus episcopus seruus seruorum Dei. Dilecto filio Aymerico Burguliensi abbati salutem et apostolicam benedictionem. Sicut equum est et officio religioso conueniens ortas inter uiros ecclesiasticos controuersias rationabili fine decidere, ita quidem uigor exigit equitatis, que mediante iustitia fuerunt decisa, firmare ac, ne in dubium aut recidiuam contentionem temporis processu deueniant, scripti nostri pagina communire. Ante hac uero, dilecte in domino fili Aymerice, aduersus abbatem ac monachos Noui Monasterii conquestione tua suscepta, quod ecclesiam Magniaci, que ad ius Burguliensis monasterii pertinebat, contra iustitiam detinerent, nos, ut utraque pars sine tediose dilationis obstaculo suam iustitiam obtineret, causam ipsam uenerabilibus fratribus nostris Bernardo Nannetensi et Iohanni Maglouiensi episcopis cognoscendam commisimus et appellatione remota fine debito terminandam. Qui cum sepe utrique parti diem et locum congruum assignassent et uobis in unum conuenientibus propter absentationem uel tergiuersationem alterius partis nullum causa ipsa terminum accepisset, demum uos et iudices cum multis aliis Turonis conuenistis, ubi, cum residentibus iudicibus lite iam contestata Andegauis et rationibus hinc inde propositis altera pars diffugia consueta innecteret, subprior de Caritate procedens in medium pro parte Cluniacensis abbatis ad sedem apostolicam appellauit, cui appellationi abbas quoque Noui Monasterii se adiunxit. Unde illis a consistorio discedentibus, quoniam appellatio Cluniacensis abbatis non uidebatur cognitionem ac decisionem cause remorari debere, tum uidelicet quia possessorium iudicium agebatur, tum quia tu et fratres tui restitutionem postulabatis et uiolentiam monasterio uestro non a Cluniacensibus, sed Noui Monasteriis monachis querebamini irrogatam et abbati Noui Monasterii omnis appellandi aditus in eadem causa fuerat interclusus, prefati episcopi ad inuestigationem et decisionem ipsius cause nichilominus processerunt et rationibus commisse tibi ecclesie diligenter auditis et plenarie cognitis testibusque/) uestris receptis eandem ecclesiam cum pertinentiis suis restituendam tibi et ecclesie gubernationi tue commisse adiudicarunt. Pro qua siquidem causa abbate Noui Monasterii cum quibusdam fratrum suorum ad sedem apostolicam ueniente tu quoque una cum eo ad sedem apostolicam accessisti. Vobis igitur in nostra presentia constitutis recitata est in audientia nostra et fratrum nostrorum supradictorum episcoporum sententia, proposite sunt rationes et allegationes hinc inde et nos rationibus uestris auditis et examinatis diligenter et plenarie intellectis de communi consilio fratrum nostrorum supradictorum sententiam confirmauimus et ecclesiam illam cum decimis et possessionibus suis monasterio Burguliensi decreuimus integre fore restituendam, salua tamen in questione proprietatis. Nulli ergo omnino hominum etc. Si quis autem etc.
R. Ego Adrianus catholicae aecclesiae episcopus ss.
Ego Cencius Portuen(sis) et sancte Rufine episcopus ss.
Ego Guido presb. card. tit. sancti Grisogoni ss.
Ego Hubaldus presb. card. tit. sancte Praxed(is) ss.
Ego Manfredus presb. card. tit. sancte Sauine ss.
Ego Iulius presb. card. tit. sancti Marcelli ss.
Ego Hubaldus presb. card. tit. sancte Crucis in Hierusalem ss.
Ego Bernardus presb. card. tit. sancti Clementis ss.
Ego Octauianus presb. card. tit. sancte Cecilie ss.
Ego Gerardus presb. card. tit. sancti Stephani in Celio monte ss.
Ego Henricus presb. card. tit. sanctorum Nerei et Achillei ss.
Ego Iohannes presb. card. tit. sanctorum Siluestri et Martini ss.
Ego Oddo diac. card. sancti Georgii ad uelum aureum ss.
Ego Guido diac. card. sancte Marie in porticu ss.
Ego Iacintus diac. card. sancte Marie in Cosmydyn ss.
Dat. Beneuenti per manum Rolandi sancte Romane ecclesie presbiteri cardinalis et cancellarii XIII kal. april., indictione IV, incarnationis dominice anno M.C.L.V, pontificatus uero domni Adriani pape IIII anno secundo.