Datierung: 1155 01 12
Ausstellungsort: Rom, St. Peter
Adrianus episcopus seruus seruorum Dei. Dilectis filiis Marino priori ecclesiae sancti Maurilii eiusque fratribus tam presentibus quam futuris canonice substituendis in perpetuum. Effectum iusta postulantibus indulgere et uigor equitatis et ordo exigit rationis, praesertim quando petentium uoluntatem et pietas adiuuat et ueritas non relinquit. Eapropter, dilecti in domino filii, uestris iustis postulationibus clementer annuimus et praefatam ecclesiam, cui auctore domino deseruitis, sub beati Petri et nostra protectione suscipimus et praesentis scripti patrocinio communimus. Statuentes, ut quascumque possessiones, quaecumque bona in praesentiarum iuste et canonice possidetis aut in futurum concessione pontificum, largitione regum uel principum, oblatione fidelium seu aliis iustis modis domino propitio poteritis adipisci, firma uobis uestrisque successoribus et illibata permaneant. In quibus haec propriis duximus exprimenda uocabulis: parochiam uidelicet et burgum, in quo eadem ecclesia sita est, cum omni iustitia, censibus, uendis et aliis pertinentiis suis, censum et uendas de domo Aimerici de Tralaueio, burgum sancti Lamberti cum ecclesia eiusdem burgi, iustitia, censibus, uendis et aliis pertinentiis suis, decimam de uilla Fanaria, censum duorum solidorum de domo Gorronis et decimam terrae ipsius, quam habet apud sanctum Lambertum, et omnium amplificationum suarum acquisitarum uel acquirendarum in eadem parochia et quidquid ex dono antecessorum Rainaldi Rufi de Plessiaco habetis. Praeterea donationem trium praebendarum, duarum uidelicet in ecclesia uestra et unius in maiori ecclesia, sicut ad uos rationabiliter pertinet, auctoritate uobis apostolica confirmamus. Decernimus ergo, ut nulli omnino hominum liceat praefatam ecclesiam temere perturbare aut eius possessiones aufferre uel ablatas retinere, minuere aut aliquibus uexationibus fatigare, sed omnia integra conseruentur eorum, pro quorum gubernatione et sustentatione concessa sunt, usibus omnimodis profutura, salua dioecesani episcopi canonica iustitia. Si qua igitur in futurum ecclesiastica saecularisue persona hanc nostrae constitutionis paginam sciens contra eam temere uenire tentauerit, secundo tertioue commonita, si non satisfactione congrua emendauerit, potestatis honorisque sui dignitate careat reamque se diuino iudicio existere de perpetrata iniquitate cognoscat et a sacratissimo corpore et sanguine Dei et domini redemptoris nostri Iesu Christi aliena fiat atque in extremo examine districtae ultioni subiaceat. Cunctis autem eidem loco iusta seruantibus sit pax domini nostri Iesu Christi, quatenus et hic fructum bonae actionis percipiant et apud districtum iudicem praemia aeternae pacis inueniant. Amen. Amen.
R. Ego Adrianus catholicae ecclesiae episcopus ss.
Ego Imarus Tusculanus episcopus ss.
Ego Hugo Hostiensis episcopus ss.
Ego Gregorius Sabinensis episcopus ss.
Ego Guido presb. card. tit. sancti Grisogoni ss.
Ego Hubaldus presb. card. tit. sanctae Praxedis ss.
Ego Manfredus presb. card. tit. sanctae Sauinae ss.
Ego Aribertus presb. card. tit. sanctae Anastasiae ss.
Ego Iulius presb. card. tit. sancti Marcelli ss.
Ego Hubaldus presb. card. Tit. sanctae Crucis in Ierusalem ss.
Ego Astaldus presb. card. tit. sanctae Priscae ss.
Ego Iohannes presb. card. sanctorum Iohannis et Pauli tit. Pamachii ss.
Ego Iohannes presb. card. tit. sanctorum Siluestri et Marci ss.
Ego Guido diac. card. sanctae Mariae in porticu ss.
Ego Ioannes diac. card. sanctorum Sergii et Bacchi ss.
Ego Ildebrandus diac. card. sancti Eustachii ss.
Ego Odo diac. card. sancti Nicolai in carcere Tulliano ss.
Dat. Romae apud sanctum Petrum per manum Rolandi sanctae Romanae ecclesiae presbiteri cardinalis et cancellarii II idus ian., indictione III, incarnationis dominicae anno Mo. Co. Lo. IIIIo, pontificatus uero domni Adriani pape IIII anno I.