Datierung: 1146 01 09
Ausstellungsort: Lateran
Eugenius episcopus seruus seruorum Dei. Dilectis filiis Petro Trenorciensi abbati eiusque fratribus tam praesentibus quam futuris regularem uitam professis in perpetuum. Ex commisso nobis a Deo apostolatus officio tam uicinis quam longe positis existimus debitores. Cumque omnes fratres communiter honorare ac diligere debeamus et ecclesiis sibi commissis debitam conseruare iustitiam, propensiori tamen studio caritatis illos nos conuenit confouere, quos ampliori morum honestate ac religionis nitore constat esse per Dei gratiam illustratos. Eapropter, dilecti in domino filii, uestris iustis postulationibus clementer annuimus et praedecessorum nostrorum felicis memoriae Urbani, Calixti, Innocentii et Lucii Romanorum pontificum uestigiis inhaerentes Trinorciense monasterium, in quo diuino mancipati estis obsequio, sub beati Petri et nostra protectione suscipimus et presentis scripti priuilegio communimus. Statuentes, ut quascunque possessiones, quaecunque bona idem monasterium impresentiarum iuste et canonice possidet aut in futurum concessione pontificum, liberalitate regum, largitione principum, oblatione fidelium seu aliis iustis modis Deo propitio poterit adipisci, firma uobis uestrisque successoribus et illibata permaneant. In quibus haec propriis duximus exprimenda uocabulis: scilicet in episcopatu Cabilonensi Pistiacum, Aculiacum, Vasliacum; in episcopatu Matisconensi Ulchisiacum, Villare, Plotas; in episcopatu Pictauensi Herum insulam, ecclesias de Bello Uidere; in episcopatu Andegauensi cellam Cunaldi; in episcopatu Aniciensi cellam, quae uocatur Godit; in episcopatu Uiuariensi ecclesiam sancti Martini Cucuruensis; in episcopatu Aruernensi monasterium sancti Portiani, ecclesiam Barbariaci, aecclesiam Verneici, aecclesiam de Boiaco, aecclesiam de Nerinec, de Charel, de Monte Aureo, de Martilec, aecclesiam de Brancar, aecclesiam de Lafelina, de Villena, de Parei, de Varinas, de Voroz, de sancto Lupo, de Beciaco, de Mastifrei, de Bessonii, de Chapels, de Noalit, de sancto Germano, de Quintiniaco, de Poliuez, de Uernolio, de Serrec, de Sostis, de Brial; in episcopatu Uiennensi cellam sanctae Agnetis de Mota; in episcopatu Lucdunensi aecclesiam sancti Andreae de Belgiaco, Bisiacum. Decernimus ergo, ut nulli omnino hominum liceat praefatum monasterium temere perturbare aut eius possessiones auferre uel ablatas retinere, minuere seu quibuslibet uexationibus fatigare, sed omnia integra conseruentur eorum, pro quorum gubernatione et sustentatione concessa sunt, usibus omnimodis profutura, salua nimirum in omnibus sedis apostolicae auctoritate. Si qua igitur aecclesiastica saecularisue persona hanc nostrae constitutionis paginam sciens contra eam temere uenire temptauerit, secundo tertioue commonita, si non satisfactione congrua emendauerit, potestatis honorisque sui dignitate careat reamque se diuino iudicio existere de perpetrata iniquitate cognoscat et a sacratissimo corpore ac sanguine Dei et domini redemptoris nostri Iesu Christi aliena fiat atque in extremo examine districtae ultioni subiaceat. Cunctis autem eidem loco iusta seruantibus sit pax domini nostri Iesu Christi, quatenus et hic fructum bonae actionis percipiant et apud districtum iudicem praemia aeternae pacis inueniant. Amen. Amen. Amen.
R. Ego Eugenius catholicae aecclesiae episcopus ss.
Ego Conradus Sabinensis episcopus ss.
Ego Albericus Hostiensis episcopus ss.
Ego Gregorius presb card. tit. sancti Calixti ss.
Ego Hubaldus presb. card. tit. sanctae Praxedis ss.
Ego Nicolaus presb. card. tit. sancti Cyriaci ss.
Ego Ubaldus presb. card. tit. sanctae Crucis in Ierusalem ss.
Ego Oddo diac. Card. sancti Georgii ad uelum aureum ss.
Ego Octauianus diac. card. sancti Nicolai in carcere Tulliano ss.
Ego Gregorius diac. card. sancti Angeli ss.
Ego Astaldus diac. card. sancti Eustachii iuxta templum Agrippe ss.
Ego Guido diac. card. sanctae Mariae in porticu ss.
Ego Iacintus diac. card. sanctae Mariae in Cosmidin ss.
Ego Petrus diac. card. sanctae Mariae in uia lata ss.
[Dat. Laterani per manum Roberti sanctae Romanae ecclesiae presbyteri cardinalis et cancellarii V idus ianuarii, indictione VIIII, incarnationis dominicae anno M. C. XLV, pontificatus uero domni Eugenii papae III anno primo.]