REGEST MABILLE: Fondation de la gratuité des écoles de Saint-Martin par Amalric et Adalard. Cette charte n’était vraisemblablement qu’une répétition de celle analysée ci-dessus sous le n° XXXV, et que Lesueur et dom Ans. Le Michel portent à la fois aux f°s 40 et 129 de la Pancarte Noire. Dom Anselme Le Michel ajoute que cette copie fourmillait de barbarismes: « Omnino carta haec horret barbarismis. »
REGEST EDITION: Donum Amalrici Canonici. Pro Scholis Sancti Martini Turonensis.
Datierung: MABILLE: 841
EDITION: Durand, Ursin und Edmond Martène (Hgg.): Thesaurus Novus Anecdotorum Tomus Primus, Paris 1717 (Thesaurus Novus Anecdotorum 1), Sp. 32-33.
Ingens ineffabilisque nobiscum Dei Patris semper misericordia, cujus gratuita clementia reatus primi hominis sorde liberamur, sive salvamur quotidie, quae generaliter largita est potestatem redimendi diversa peccaminum nostri commissa. Sed quanto inenarrabilis atque praecipua, quam ex rebus propriis, quas ipsa dedit pollicens mercedem pleni calicis aquae frigidae, necnon eleemosynam penitus delere peccata, sicut aqua ignem. Quamobrem ego Amalricus levita exiguus coenobii B. Martini cum videam circumseptum me hinc inde delictorum pondere, pavens ante oculos nequitiarum molem, saepissime cum lacrymarum fonte, seu tormentorum gehennae reminiscendo casus extremae diei, sanctae Trinitatis in nomine pro salute animae beatitudineque vitae aeternae offero Creatori Deo, necnon sancto Martino Domino meo gloriosissimo, quem toto affectu intentionis diligo, ut propitium merear habere Dominum, seu beatissimum Martinum intercessorem, meisque exutus esse nequitiis in die obitus, ubi nullum auxilium, nisi per Dei pietatem indicibilem; oblatumque in perpetuum perpetualiter esse res volo meas, quas de progenie parentum legibus praesenti tempore videor habere, seu de qualibet comparatione, aut quolibet adtractu, id est, mansum unum indominicatum, seu alterum servile in pago Turonico, in villa Martiniaco, in vicaria Ereninse, cum terris, domibus, aedificiis, vineis, silvis, pratis, pascuis, aquis, aquarumque decursibus, mobilibus et immobilibus, cultis et incultis, aliisque adjacentiis, sive tertium in pago Blesinse, in condita Cabrinacense, in loco nuncupato Alnarias, cum domibus, aedificiis, terris, vineis, silvis, pratis, pascuis, aquis, aquarumve decursibus, mobilibus et immobilibus, cultis et incultis, quantumcumque praesenti tempore mea videtur esse possessio supradictis in locis, totum et ad integrum de mea trado potestate in jus dominationemque beati Martini ejusque rectoris ecclesiae, eo quin etiam modo sicut inferius insertum est. In hujus vero meriti compensatione ego Adalardus rector humillimus beati Martini ecclesiae animadvertens auctoritate divinae sententiae, qua praecipitur: gratis accepistis, gratis date; vidensque extra Dei praeceptum in nostra schola de doctrina scientiae exigere meritum veluti ex ceteris mundanis negotiis, licet haec abominabilis praedecessorum meorum temporibus increverit consuetudo, ad observationem Jesu Christi verborum perfectionemque pro remedio animae meae aeternaque retributione, atque jam dictae pessimae consuetudinis per omnia exterminatione, per consensum tam clericorum, quam laicorum unanimem congregationis B. Martini concedo eidem Amalrico, Miloni, sive Guichardo omnes res superius nominatas, et quidquid idem Amalricus nostri beneficii habere modo, videlicet in villa Fontanis, Curciaco, sive Martiniaco, scilicet inter Calimacum et Picteum mundatum, mansos duos, et medium, ea videlicet ratione, ut ab hodierna die in schola jam dictae de psalmis notis aliisque nihil meriti quaerant vel accipiant, nisi quod sponte oblatum fuerit, sed ex supradictis omnibus rebus necessaria corporis sibi suisque colaborantibus ministrent, atque cum omni intentione, sicut Deus praecepit, devotissime laborent sine pretio, neque deinceps a me, aut ab aliquo successore amplius servitii quaeratur, sicque quicumque per horum obitum successor scholae extiterit, instituo pro Dei amore, ut omnes res jam dictas habeat, neque aliquid meriti doctrinae accipiat ex ea, vel licentiam exigendi habeat, nisi quod ei datum sit sponte; et si acciderit, quod absit, ut aliquis meorum successorum hanc constitutionem ammonitione divina statutam per hortationem alicujus malevoli violet in aliquo, libera sit licentia statim tam MILONI quam GUICHARDO supradictos mansos recipere ad proprium, et inde facere quidquid libuerit jure proprietario; mihi quoque quasi semper stabile sit merces permaneat. Si vero fuerit, aut ego, aut aliquis ex heredibus, vel coheredibus meis, aut alia aliunde introducta persona, quas contra hanc seriem scripturae venire, aut aliquid calumniae praesumserit inferre, quod vult nequeat obtinere. Insuper cui litem intulerit, X. libras auri cogatur exsolvere, et sua repetitio nullo fruatur effectu; sed haec scriptura firma et stabilis omni tempore valeat permanere.