REGEST MABILLE: Charles-le-Chauve donne pour le rachat de ses fautes, au monastère de Saint-Martin et à l’église de Notre-Dame, située près du dit monastère pour subvenir aux frais de sépulture des pauvres, certains biens à lui appartenant, situés dans le pays de Senlis, au lieu dit Balagni et aux environs.
REGEST EDITION: Dieses Regest ist nicht öffentlich zugänglich.
Datierung: MABILLE: 849 03 13; EDITION: 849 03 13
EDITION: Tessier, Georges (Hg.): Recueil des actes de Charles II le Chauve, Roi de France. Tome 1, Paris 1943 (Chartes et diplômes relatifs a l’histoire de France 8), S. 297-300, Nr. 112.
In nomine sanctae et individuae Trinitatis. Karolus gratia Dei rex. Quaecumque amore Dei et reverentia sanctorum locis divinis cultibus mancipatis largitatis munere conferimus, profutura nobis ad aeternam beatitudinem feliciter obtinendam et ad praesentem vitam cum prosperitate transigendam nullatenus dubitamus. Itaque notum sit omnibus sanctae Dei Ecclesiae fidelibus et nostris, praesentibus atque futuris, quia, pro redemptione peccatorum nostrorum, complacuit nobis quasdam res nostrae proprietatis sitas in pago Silvanectensi conferre et delegare basilicae non longe a monasterio sacratissimi patris Martini, sub honore sanctae Dei genitricis Mariae et sanctorum apostolorum Petri et Pauli, Johannis quoque Baptistae ac sancti Dionisii gloriosi martyris necnon et beati Martini aliorumque sanctorum constructae sive fundatae et ad sepulturam pauperum deputatae, simulque sacrosancto sepulchro antefati praeclarissimi confessoris et patroni nostri Martini speciali adhesione subjectae. Sunt autem ipsae res in praemisso pago sitae, hoc est in villa Baliniaco inter vineam et edificia et gardinium sive cortem bunuarium unum, de terra arabili bunuaria triginta quinque, [de] silva bunuaria triginta; sunt etiam ibi hospitia tria quorum unicuique appendent de terra arabili bunuaria sex et aripenni duo; in alio siquidem loco, id est inter montem Agebodi et locum qui dicitur Bragio, de terra arabili sive mansionili et cultoribus bunuaria viginti quatuor, et in Aviliaco de terra culta vel inculta bunuaria centum triginta unum, et de prato bunuaria sex, de silva bunuaria triginta octo; est etiam ibi mancipium unum, Harigarius nomine, quod habet hospitium unum unde providet eandem silvam sibi commissam; praeterea in villa Brittanorum mansellum unum, et de vinea aripennem unum, et inter vineas terrasque arabiles bunuaria novem et aripennem unum; in villa vero Rubrido, inter mansuram et terram arabilem bunuaria decem, et inter ea, villa Aviliaco, de terra bunuaria duo et medium, et mansuram unam quae habet plus minusve aripennem unum, et per diversa loca in ipso pago bunuaria sex et medium ; has denique res praemissae basilicae ad sepulturam pauperum structae et sacrosancto sepulchro beati Martini subjectae pleniter conferimus et regaliter delegamus ut quicquid ex eis fieri aut exigi ecclesiastico jure potest ejusdem loci honestatibus et necessitatibus sive utilitatibus per omnia tempora praebeat conferatque supplementum et animae nostrae prosit in adjutorium. Constituimus etiam ut ejus ordinatione eadem basilica cum omnibus sibi appendentibus et his et aliis rebus agatur et disponatur, cui commissa omni tempore saepe memorati sacrosancti sepulchri fuerit observantiae obedientia nullique aliquando has easdem res aut alias ipsi basilicae pertinentes in alios praeterquam dicimus retorquere aut redigere liceat usus. Et ut haec nostrae collationis auctoritas semper firmior habeatur, manu nostra eam subter firmavimus et de anulo nostro sigillari jussimus.
Signum Karoli gloriosissimi regis.
Aeneas notarius ad vicem Hludowici recognovit et subscripsit.
Data III idus martii, indictione XII, in anno VIIII regni Karoli gloriosissimi regis. Actum in Carisiaco palatio regio. In Dei nomine feliciter. Amen.